Në Universitetin Politeknik të Tiranës deri tani janë plotësuar 71% e kuotave për vitin e ri akademik, 2025-2026 që nis më 6 tetor.
Rektori i UPT-së, prof. dr. Akli Fundo tha sot, në një intervistë për ATSH-në, se “në raundin e parë të regjistrimeve janë plotësuar kuotat në Fakultetin e Arkitekturës në të treja degët dhe kjo është edhe për shkak të konkursit, që i bën maturantët kandidatë të dedikuar për atë fakultet”.
“Në Fakultetin e Teknologjisë së Informacionit kuotat janë plotësuar mbi 90% dhe nuk bëhen 100% për mënyrën se si studentët që do të ndjekin vitin e parë bachelor do të regjistrohen, por në raundin e dytë të regjistrimeve bëhen 100%”, theksoi Fundo.
Ndërkohë, ka ende kuota të lira në Fakultetin e Teknologjisë së Informacionit, në Fakultetin e Inxhinierisë Mekanike, Fakultetin e Inxhinierisë Elektrike, Fakultetin e Inxhinierisë së Ndërtimit, Fakultetin e Inxhinierisë Matematike dhe Inxhinierisë Fizike si dhe dhe në Fakultetin e Gjeologjisë dhe Minierave.
Rektori Fundo bëri të ditur se “në Fakultetin e Inxhinierisë Matematike dhe Inxhinierisë Fizike kemi edhe një degë të re që është Inxhinieria Matematike dhe Data Science (Shkenca e të Dhënave). Në disa degë të këtyre fakulteteve kuotat janë plotësuar mbi 90%, ku në degën e Inxhinierisë së Ndërtimit numri i studentëve të regjistruar është 118 nga 120 kuota”.
Sipas rektorit Fundo, të gjitha degët e UPT janë të preferuara dhe trendi është në rritje.
“Tek Inxhinieria Informatike ishin mbi 3500 kërkesa për 126 vende. Më të preferuara janë degët e fakulteteve të Teknologjisë së Informacionit, Arkitekturës dhe Urbanistikës, Inxhinierisë së Ndërtimit, Inxhinierisë Elektrike dhe Inxhinierisë Mekanike”, tha Fundo.
Raundi i dytë i regjistrimeve në universitete nis më 29 shtator dhe do të zgjasë deri më 8 tetor.
