Doha, 3 tetor Zhurnal.mk – Një anije cisternë nafte është goditur sot nga një “raketë e paidentifikuar” teksa po largohej nga Ngushtica e Hormuzit, duke shkaktuar zjarr dhe dëmtime në sistemin elektrik të anijes. Lajmi u bë i ditur nga shërbimi britanik i informacionit për sigurinë detare UKMTO.
Sipas UKMTO, zjarri që shpërtheu pas goditjes është vënë nën kontroll dhe incidenti nuk ka shkaktuar viktima apo dëme mjedisore. Pavarësisht dëmtimeve, anija ka vijuar lundrimin në kursin e saj.
Deri tani nuk janë bërë të ditura detaje mbi kombësinë e cisternës, portin nga i cili ishte nisur apo destinacionin e saj. Po ashtu, nuk është identifikuar autorësia e sulmit.
Ngushtica e Hormuzit është një prej korridoreve më të rëndësishme të transportit të energjisë në botë. Përpara konfliktit, përmes saj kalonte rreth një e pesta e furnizimeve globale me hidrokarbure.
Ngushtica është kthyer në një pikë të nxehtë që prej fillimit të konfliktit mes Shteteve të Bashkuara, Izraelit dhe Iranit. Sipas raportimeve, Irani ka vendosur nën kontroll pjesë të rëndësishme të kalimit detar, duke shkaktuar ndërprerje të mëdha të lundrimit, ndërsa Shtetet e Bashkuara janë përgjigjur me masa bllokuese ndaj porteve iraniane.
Pas një periudhe relative qetësie në javët e fundit, incidenti i ri rikthen shqetësimet për sigurinë e anijeve që kalojnë në këtë rrugë strategjike detare. Shtetet e Bashkuara nuk kanë kryer sulme ndaj Iranit që prej 1 shtatorit, ndërsa raportimet për incidente ndaj anijeve në Ngushticën e Hormuzit kanë vijuar.
