Shkup, 16 qershor, Zhurnal.mk – VLEN ka reaguar ndaj kritikave të Bashkimit Demokratik për Integrim (BDI) lidhur me projektin e autostradës Shkup-Bllacë, duke pretenduar se kundërshtimet e partisë opozitare lidhen me interesa private dhe jo me interesin publik, transmeton Zhurnal.mk.
Në një reagim publik, VLEN deklaron se “piskamat e BDI-së” për këtë projekt kanë vetëm një arsye, duke aluduar se trasa e autostradës nuk kalon nëpër zona ku, sipas tyre, janë bërë investime dhe blerje tokash me pritje për përfitime nga procesi i shpronësimit.
“Për herë të parë fitojnë qytetarët, e jo interesat partiake. Kjo është arsyeja e vërtetë e zhurmës së tyre. Përpjekja që autostrada të shërbejë për interesa individuale dhe jo për interes të qytetarit ka dështuar”, thuhet në reagimin e VLEN-it.
Sipas koalicionit qeveritar, trasa e autostradës po realizohet mbi baza profesionale dhe në funksion të interesit publik, ndërsa projekti do të sjellë përfitime për qytetarët, bizneset dhe ekonominë e vendit, si dhe do të forcojë lidhjen strategjike me Kosovën.
VLEN vlerëson se për vite me radhë projekti i autostradës Shkup-Bllacë ka mbetur i bllokuar për shkak të interesave të ngushta politike dhe individuale, ndërsa tani po avancon drejt realizimit.
“Autostrada Shkup-Bllacë është dëshmia më e mirë e dallimit mes dy qasjeve politike: 24 vite premtime pa realizim dhe 24 muaj angazhim që e çojnë projektin drejt përfundimit”, theksojnë nga VLEN.
Koalicioni shton se nuk është pjesë e qeverisë për të mbrojtur interesa private, por për të realizuar projekte që, sipas tyre, për dekada janë përdorur vetëm për propagandë politike.
Debati për autostradën Shkup-Bllacë është intensifikuar ditët e fundit, me akuza dhe kundërakuza mes VLEN-it dhe BDI-së lidhur me trasenë, dinamikën e realizimit dhe menaxhimin e njërit prej projekteve më të rëndësishme infrastrukturore në vend.
