Kaliforni, 16 qershor, Zhurnal.mk – Tetë persona, mes tyre dy punonjës të kompanisë “Boeing”, humbën jetën pasi një bombardues strategjik B-52 i Forcave Ajrore të SHBA-së, u rrëzua menjëherë pas ngritjes nga Baza e Forcave Ajrore “Edwards”, në Kaliforninë Jugore, raportoi BBC.
Aksidenti ndodhi dje rreth orës 11:20 me orën lokale, gjatë një misioni rutinë testimi.
Komandanti i bazës, James Hayes, e cilësoi ngjarjen si një “tragjedi të rëndë”, duke bërë të ditur se viktimat ishin pjesëtarë të ushtrisë, punonjës civilë të qeverisë dhe kontraktorë federalë.
Sipas tij, indikacionet e para tregojnë se aksidenti nuk kishte të mbijetuar.
Autoritetet kanë nisur hetimet, për të përcaktuar shkaqet e rrëzimit, por theksuan se nuk është arritur ende në asnjë përfundim.
Hetimi fillestar mund të zgjasë deri në 30 ditë, ndërsa analiza e plotë e shkaqeve mund të marrë më shumë se gjashtë muaj.
Kompania “Boeing” konfirmoi se dy prej punonjësve të saj ndodheshin në bord dhe shprehu ngushëllime për familjet e viktimave.
Guvernatori i Kalifornisë, Gavin Newsom e quajti ngjarjen një “incident tragjik” dhe shprehu solidaritet me familjet e viktimave dhe komunitetin e bazës ajrore.
Bombarduesi “Boeing B-52 Stratofortress” është një nga avionët më të njohur të arsenalit amerikan dhe përdoret që nga vitet 1950.
Ai ka kapacitet të mbajë armë konvencionale dhe bërthamore, ndërsa konsiderohet një element kyç i forcës strategjike ajrore të SHBA-së.
Baza e Forcave Ajrore “Edwards” ndodhet rreth 160 kilometra në veri të Los Anxhelesit, në shkretëtirën Mojave. Operacionet në bazë janë pezulluar përkohësisht pas aksidentit.
