Shkup, 05 qershor, Zhurnal.mk – VLEN vlerëson se Panairi i Librit shqip “Shkup 2026”, i organizuar në sheshin “Skënderbeu” nën moton “Gjuha jonë sa e mirë”, e ka shndërruar kryeqytetin në një qendër të kulturës, dijes dhe promovimit të gjuhës shqipe.
Sipas VLEN-it, sheshi “Skënderbeu” këto ditë nuk ka qenë vetëm një hapësirë publike, por një vendtakim i autorëve, botuesve, lexuesve dhe dashamirësve të librit, duke sjellë një atmosferë të veçantë kulturore në zemër të Shkupit.
Në panair morën pjesë 55 shtëpi botuese nga Maqedonia e Veriut, Kosova dhe Shqipëria, të cilat prezantuan mijëra tituj për vizitorët. Ngjarja mblodhi autorë, të rinj, familje dhe qytetarë të shumtë, duke e kthyer librin shqip në qendër të vëmendjes publike.
VLEN thekson se organizimi i këtij aktiviteti u mundësua falë angazhimit të kryetarit të Komunës së Çairit dhe njëherit bashkëkryetar i koalicionit, Izet Mexhiti, në bashkëpunim me organizatorët, botuesit dhe mbështetësit e librit.
“Ky është shembulli më i mirë se si kultura bëhet pjesë e gjallë e qytetit kur ka vullnet, përkushtim dhe vizion. Një qytet që i hap vend librit, i hap vend dijes, vetëdijes dhe të ardhmes”, thuhet në njoftimin e VLEN-it.
