Ankara, 24 qershor, Zhurnal.mk – Një person i dyshuar si anëtar i grupit terrorist Shteti Islamik (ISIS) është vrarë në një shkëmbim zjarri me forcat e rendit në Ankara, gjatë një operacioni për arrestimin e personave të dyshuar për lidhje me të ashtuquajturin Shtet Islamik, përpara samitit të NATO-s që do të mbahet më 7 dhe 8 korrik.
Sipas televizionit turk NTV, policia bastisi një banesë në zonën e Haymanas, në provincën e Ankarasë, ku ndodhej i dyshuari.
Autoritetet pretendojnë se ai kishte dhënë udhëzime për kryerjen e një sulmi përmes rrjeteve sociale përpara samitit të NATO-s.
Gjatë operacionit shpërtheu një përpleshje me armë mes policisë dhe të dyshuarit.
Si pasojë e shkëmbimit të zjarrit, i dyshuari mbeti i vrarë, ndërsa bashkëshortja e tij u plagos.
Autoritetet turke kanë shtuar masat e sigurisë përpara samitit të NATO, ndërsa hetimet mbi rastin vazhdojnë.
Në samitin e NATO-s, pritet të marrin pjesë edhe presidenti amerikan Donald Trump, pjesëmarrja e të cilit është konfirmuar nga zyrtarët amerikanë, sekretari i Përgjithshëm i NATO-s Mark Rutte dhe liderë të tjerë te vendeve të Aleancës së Atlantikut Verior.
