Berlin, 6 maj, Zhurnal.mk – Ministri i Jashtëm gjerman, Johann Wadephul i ka bërë thirrje Iranit të rikthehet në tryezën e negociatave, pas sulmeve me dronë dhe raketa ndaj Emirateve të Bashkuara Arabe (EBA).
“Ne i bëjmë thirrje Iranit të mos e teprojë me kartat e tij”, tha dje në mbrëmje Wadephul, gjatë një konference të përbashkët për shtyp me homologun e tij izraelit Gideon Sa’ar, në Berlin.
Ai theksoi se është gjithnjë e më urgjente që Irani të pranojë ofertën për negociata, duke shtuar se Gjermania dënon sulmet e fundit.
Sipas tij, duhet shmangur rikthimi në konflikt dhe lufta duhet të përfundojë, por në një mënyrë që të mos krijojë më rrezik nga Irani – as për Izraelin, as për vendet e rajonit dhe as për Evropën.
Wadephul theksoi gjithashtu se Irani nuk duhet të lejohet të pajiset me armë bërthamore dhe duhet të heqë dorë nga programi i raketave balistike, si dhe nga politikat e tij destabilizuese në rajon.
Sipas tij, Gjermania dhe Izraeli ndajnë të njëjtat objektiva dhe interesa sigurie në këtë drejtim.
Nga ana e tij, ministri izraelit Gideon Sa’ar i cilësoi sulmet e fundit ndaj EBA-së si dëshmi – se regjimi në Teheran ka “karakterin e një të çmenduri”, duke theksuar se duhet parandaluar me çdo kusht pajisja e Iranit me armë bërthamore.
Sulmi ndaj EBA-së shkaktoi një zjarr të madh në një depo nafte në portin e Fujairahut.
Ndërkohë, Garda Revolucionare Islamike e Iranit (IRGC) deklaroi se kishte lëshuar raketa drejt anijeve të Marinës amerikane, si paralajmërim.
