Gostivar, 2 shkurt – Me një program të organizuar në Xhaminë e Sahatit në Gostivar, është shënuar Nata e Beratit, e cila konsiderohet si natë lajmëruese për ardhjen e muajit të Ramazanit, raporton Anadolu.
Programi u mbajt pas namazit të jacisë në organizim nga Bashkësia Fetare Islame e Maqedonisë së Veriut (BFI) – Myftinia Gostivar dhe Dijaneti i Turqisë, me pjesëmarrje të besimtarëve të shumtë dhe personaliteteve të ndryshme, përfshirë kryetarin e BFI-së, Shaqir Fetahu, ambasadorin e Turqisë në Shkup, Fatih Ulusoy, si dhe këshilltarin për çështje fetare pranë ambasadës turke, Mustafa Bodur.
Gjatë programit u lexuan pjesë nga Kurani Famëlartë dhe lutje, si dhe u interpretuan ilahi.
Ndryshe, Nata e Beratit konsiderohet nga netët e mëdha në besimin islam dhe shënohet në natën e 15-të të muajit Shaban sipas kalendarit islam, që këtë vit përkon me natën që lidh 2 dhe 3 shkurtin, ndërsa llogaritet lajmërues për ardhjen e muajit të Ramazanit, si dhe natë e pastrimit nga mëkatet, natë e dëshirave dhe e përcaktimit të fatit.
Në vende të ndryshme, kjo natë shënohet me programe dhe aktivitete të ndryshme.
