Ministri i Jashtëm kinez Wang Yi tha në Konferencën e Sigurisë të Mynihut (MSC) të shtunën se Kina dhe Evropa janë partnere, jo rivale, dhe u bëri thirrje të dyja palëve të kërkojnë harmoninë, duke respektuar dallimet e tyre.
Wang, tha se peizazhi ndërkombëtar është bërë gjithnjë e më i trazuar dhe kompleks gjatë vitit të kaluar.
Në përgjigje të rreziqeve në rritje ndaj sigurisë dhe ndërthurjes së sfidave globale, Wang theksoi që Kina mbetet e përkushtuar ndaj multilateralizmit dhe demokratizimit të marrëdhënieve ndërkombëtare.
Në fjalimin e tij në sesionin “Kina në botë”, Wang përshkroi vizionin e Kinës për trajtimin e pasigurisë globale dhe reformimin e rendit global.
Wang tha se për të reformuar dhe përmirësuar qeverisjen globale, është së pari e rëndësishme të rigjallërohet sistemi i Kombeve të Bashkuara.
Në platformën e Kombeve të Bashkuara, të gjitha vendet, pavarësisht nga madhësia apo pasuria, mund të bëjnë që zëri i tyre të dëgjohet, vuri në dukje Wang.
Duke folur për zhvillimin e ardhshëm të marrëdhënieve Kinë-Evropë, Wang theksoi që Kina dhe Evropa janë partnere e jo rivale.
Në intervistën e tij me kryetarin e MSC-së, Wolfgang Ischinger, Wang paralajmëroi se trajtimi i Kinës si një kërcënim dhe shfaqja e një paragjykimi të vazhdueshëm anti-Kinë është toksik për zhvillimin e ardhshëm të marrëdhënieve Kinë-BE.
Kur u pyet se si Kina dhe Evropa mund të forcojnë komunikimin strategjik për të rritur besimin e ndërsjellë dhe për të ndërtuar një partneritet të qëndrueshëm e afatgjatë, Wang theksoi suksesin e tregtisë dypalëshe, duke përmendur vëllimin e lartë të tregtisë midis dy palëve.
