Kryeministri i Kosovës, Albin Kurti ka zhvilluar një bisedë telefonike me komisioneren për Zgjerim të Bashkimit Evropian, Marta Kos.
Gjatë komunikimit, siç njofton zyra e shtypit e Kryeministrit Kurti, palët kanë biseduar për zgjerimin dhe ecurinë e reformave të Kosovës drejt integrimit në Bashkmin Evropian.
Sipas njoftimit të Zyrës së Kryeministrit, gjatë bisedës u theksua se integrimi në Bashkimin Evropian mbetet prioritet kyç i Qeverisë së Kosovës.
“Kryeministri nënvizoi rëndësinë e marrjes së statusit kandidat si hap të rëndësishëm për anëtarësim në Bashkimin Evropian”, thuhet në njoftim.
Kryeministri Kurti, lexohet në njoftim, theksoi se ndër vendimet e para të Kuvendit të Republikës së Kosovës, krahas miratimit të buxhetit të ri në vlerë prej 4 miliardë euro, ishte edhe miratimi i Planit të Rritjes në vlerë prej 882.6 milionë euro, i cili synon përshpejtimin e reformave dhe zhvillimin ekonomik të vendit.
“Pas miratimit të Planit të Rritjes, në gjashtëmujorin e parë të këtij viti janë parashikuar një sërë hapash për zbatim, të ndërlidhur ngushtë me kalimin e ligjeve në Kuvend, që kapin vlerën rreth 90 milionë euro.”
Kurti dhe Kos, bëhet e ditur se folën edhe për zhvillimet aktuale në vend dhe në rajon, duke kujtuar faktin se Kosova është e harmonizuar plotësisht me politikën e jashtme dhe të sigurisë të Bashkimit Evropian dhe i është bashkuar të gjitha pakove të sanksioneve të BE-së kundër Federatës Ruse, në përgjigje të luftës së agresionit të Rusisë kundër Ukrainës.
/Kosovapress/
