Shkup, 16 Prill, Zhurnal.mk – Kanë filluar sot punimet për rregullimin e rrugës ‘Dizhon 15’ në komunën e Çair në të cilat përfshihet edhe ujësjellësi e kanalizimi, para se té bëhet asfaltimi i saj.
Fillimin e punimeve e kanë vizituar ndërkohë Kryetari i Komunës Izet Mexhiti dhe Ministri i Mjedisit Jetësor dhe Planifikimit Hapësinor Muhamet Hoxha.
“Po realizojmë një ndërhyrje të plotë në rrjetin e ujësjellësit dhe kanalizimit fekal, me qëllim përmirësimin e kushteve të jetesës për banorët e kësaj zone,” tha Mexhiti përmes rrjetit social Facebook.
Ai sqari se projekti përfshinë rindërtimin e rrjetit kryesor të ujësjellësit në gjatësi prej 197 metrash, si dhe realizimin e 25 lidhjeve për amvisëritë. Paralelisht, do të bëhet edhe rekonstruimi i kanalizimit fekal në gjatësi prej 180 metrash.
“Pas përfundimit të punimeve nëntokësore, rruga “Dizhon 15” do të asfaltohet, duke e kthyer këtë hapësirë në një segment më funksional dhe më të rregullt për qytetarët,” tha kryerari i komunës.
Ministri Hoxha në një text të tij në Facebook tha se për këtë projekt, ministria të cilën e dhëheqë ai ka siguruar 6.9 milionë denarë, në kuadër të Thirrjes së dytë.
“Me këtë projekt investojmë drejtpërdrejt në përmirësimin e nevojave infrastrukturore të banorëve të kësaj pjese të Çairit,” shtoi ai.
