Tiranë, 4 maj, Zhurnal.mk – Gjykata e Lartë pritet të shprehet sot për një ndryshim të vendimit të saj unifikues të vitit 2011 mbi masat e sigurimit arrest në burg dhe kohëzgjatjen e paraburgimit të personave në pritje të gjykimit.
Kryetari i Partisë Demokratike, Sali Berisha, i pyetur në lidhje me këtë çështje, jashtë ambienteve të Prokurorisë së Posaçme ku u paraqit në zbatim të masës së sigurisë “detyrim paraqitje” në lidhje me dosjen “Partizani”, tha se kjo po ndodh për të lehtësuar eksponentët e partisë së krimit.
“Do zbatojë urdhrat. Sadushi është një vegël e damkosur e Edi Ramës dhe e tëra kjo ndodh për të lehtësuar eksponentët e partisë së krimit. Nuk ka asgjë të përbashkët me qytetarët. Është e tëra një lehtësim që bëhet për eksponentët e Partisë së Krimit”, tha Berisha.
Berisha gjithashtu gjatë fjalës së tij u ndal edhe te prokurori i çështjes së tij, Altin Dumani, në lidhje me deklarimin e pasurisë për një apartament në Tiranë.
Sipas tij ka një mospërputhje ne deklarimin e Dumani, ndërsa shtoi se apartamentin e ka blerë tek një person i dënuar më parë për mashtrime për shitje të apartamenteve nga dy herë.
Në fjalën e tij, Berisha deklaroi se do të ndërmarrë veprime ligjore ndaj, Altin Dumanit, duke shtuar se do të ngrejë padi.
