Teheran, 13 maj Zhurnal.mk – Irani akuzoi sot Shtetet e Bashkuara të Amerikës se po sabotojnë qëllimisht negociatat për përfundimin e luftës, ndërsa po shtohen shqetësimet se armëpushimi i brishtë i vendosur që prej fillimit të prillit mund të shembet.
Zëdhënësi i Ministrisë së Jashtme iraniane, Esmaeil Baqaei, deklaroi se SHBA-ja nuk po kërkon negociata reale, por “kapitullimin e plotë” të Iranit.
Në një intervistë për “India Today Global”, të cituar nga agjencia iraniane ISNA, ai tha se Uashingtoni po përpiqet të nënshtrojë Iranin përmes kërkesave të tij, në vend që të ndjekë një qasje diplomatike me kompromis nga të dyja palët.
Edhe zëvendësministri i Jashtëm iranian, Kazem Gharibabadi, kritikoi taktikat amerikane të negociimit, duke thënë se SHBA-ja po kërkon “një letër dorëzimi” nga Irani.
Sipas tij, pozicioni i Teheranit është i qartë: fundi i luftimeve, mosrifillimi i konfliktit, kompensime për dëmet, heqja e bllokadës dhe e sanksioneve, si dhe respektimi i të drejtave ndërkombëtare të Iranit.
Presidenti amerikan Donald Trump deklaroi të hënën se kishte refuzuar një “propozim budalla” nga Teherani për përfundimin e luftës dhe paralajmëroi se armëpushimi është “në kujdes intensiv”.
Trump pretendoi se Irani kishte rënë dakord ditët e fundit që SHBA-ja të largonte uraniumin e pasuruar nga territori iranian, por më pas kishte ndryshuar qëndrim pasi kjo nuk ishte përfshirë me shkrim në marrëveshje.
Irani e mohoi pretendimin.
Agjencia iraniane Tasnim News Agency, e afërt me Gardën Revolucionare, raportoi se ekipi negociator iranian nuk kishte pranuar kurrë që uraniumi i pasuruar të transportohej jashtë vendit.
Burime parlamentare në Teheran thanë dje se udhëheqja iraniane beson se rifillimi i luftimeve është i mundshëm, ndërsa një burim i informuar tha se aktualisht nuk ka zhvillime të reja në negociatat mes SHBA-së dhe Iranit.
