Shkup, 23 maj Zhurnal.mk – Gjykata Themelore Penale në Shkup i ka caktuar 30 ditë paraburgim shtetasit kosovar B.B. (76), i cili drejtonte kamionin që u përplas me një veturë në aksidentin tragjik në unazën e Shkupit, mes mbikalimit të Vizbegovës dhe nyjës së Mirkovcit, ku humbën jetën katër persona.
Paraburgimi është kërkuar nga Prokuroria Themelore Publike, ndërsa masa është shqiptuar mbrëmjen e djeshme për shkak të rrezikut të arratisjes dhe mundësisë për përsëritje të veprës penale, njoftuan nga Gjykata.
Në aksident humbën jetën 20-vjeçarët Marko Gjorgjievski, Petar Milanov dhe Adam Velkov, si dhe 51-vjeçari Riste Velkov, bariton operistik dhe babai i Adam Velkovit.
Shtetasi kosovar dyshohet për “vepra të rënda kundër sigurisë së njerëzve dhe pronës në komunikacion”, ndërsa sipas Prokurorisë, ai nuk e kishte përshtatur shpejtësinë dhe nuk kishte respektuar rregullat e trafikut.
