Stamboll, 25 maj, Zhurnal.mk – Presidenti turk, Recep Tayyip Erdogan ka anuluar vendimin për mbylljen e universitetit prestigjioz “Istanbul Bilgi University” në Stamboll.
Gjatë fundjavës, studentët dhe stafi akademik protestuan në kampus kundër mbylljes së universitetit, e cila ishte njoftuar të premten.
Policia përdori gaz lotsjellës dhe, sipas mediave, kreu edhe disa arrestime.
Një dekret që shfuqizon vendimin për mbylljen u publikua dje në mbrëmje në Gazetën Zyrtare të Turqisë.
Në faqen e tij zyrtare, universiteti e përshkruan veten si një ”pionier në ofrimin e një programi mësimor të orientuar drejt arteve liberale në Turqi”.
Vendimi për mbylljen ishte marrë pak para përfundimit të semestrit, duke shkaktuar zemërim te shumë studentë që rrezikonin të mos përfundonin studimet e tyre.
Në një deklaratë të publikuar në faqen e internetit, universiteti tha se lejimi i vazhdimit të aktivitetit është bërë për të garantuar të drejtën e studentëve për arsimim.
“Universiteti Bilgi”, i cili merr pjesë edhe në programin evropian të shkëmbimeve studentore “Erasmus Programme”, u vu nën kontroll shtetëror në shtator të vitit të kaluar.
Ky veprim pasoi akuzat për mashtrim dhe pastrim parash ndaj kompanisë “Can Holding”, e cila më parë ishte pronare e universitetit.
Protestat studentore u zhvilluan paralelisht me demonstratat kundër largimit të Ozgur Ozel, kreut të partisë më të madhe opozitare turke, Partia Popullore Republikane (CHP).
Ozel u shkarkua nga detyra të enjte me një vendim.
Policia ndërhyri dje në selinë e CHP-së, ku ai dhe mbështetësit e tij protestonin në ambientet e universitetit Forcat e rendit përdorën gaz lotsjellës për t’i nxjerrë nga ndërtesa.
Protesta të mëdha kundër largimit të tij u mbajtën në tre qytetet më të mëdha të Turqisë, Stamboll, Ankara dhe Izmir.
