Tiranë, 17 qershor, Zhurnal.mk – Parlamentin Europian ka rrëzuar sot amendamentin e propozuar nga disa eurodeputetë të grupit të majtë parlamentar kundër ndërtimit të resortit në Zvërnec.
Ky amendament u paraqit një ditë më parë nga eurodeputetja Ilaria Salis gjatë diskutimeve në PE për Raportin e Komisionit Europian për Shqipërinë.
Në amendamentin e tyre, eurodeputetët kërkonin shfuqizimin e ndryshimeve në Ligjin për Zonat e Mbrojtura në vitin 2024, të cilat, sipas tyre, lejojnë zhvillimin e infrastrukturës turistike në shkallë të gjerë brenda zonave të mbrojtura dhe transferojnë kompetenca kyçe të qeverisjes dhe vendimmarrjes te Këshilli Kombëtar i Territorit, duke dobësuar kështu kontrollin në mjedis.
Gjithashtu, ata shprehnin shqetësim për marrëveshjen e qeverisë me kompaninë Affinity Partners të Jared Kushner për zhvillimin e një resorti luksoz në Sazan dhe në zonën e mbrojtur Vjosë-Nartë.
Në këtë amendament të rrëzuar sot nga PE, eurodeputetët bënin thirrje për mbështetje të hetimit të nisur nga SPAK lidhur me këtë çështje dhe për garantimin e të drejtës për protestë paqësore.
Ndërsa sa i takon zonës së investimit në Zvërnec, qeveria ka sqaruar se “është pronë private e regjistruar në kadastër prej shumë vitesh. Plani i zhvillimit të asaj zone është rezultat i një marrëveshjeje mes investitorëve dhe pronarëve zotërues të titujve të pronësisë në regjistrin kadastral (njësoj si në të gjitha rastet e pafundme të zhvillimit të pronës private). Investitorët i kanë blerë pronat prej tyre dhe aktualisht janë pronarë legjitimë të truallit në fjalë”.
