Shkup, 10 korrik, Zhurnal.mk – Zëvendësministrja e Transportit, Kaltrina Zekolli, ka njoftuar se gjatë dy viteve të fundit janë siguruar mbi 7 milionë euro për realizimin e 29 projekteve infrastrukturore në territorin e Komunës së Tetovës.
Zekolli, së bashku me zëvendëskryeministrin dhe ministrin e Transportit, Aleksandar Nikoloski, si dhe kryetarin e Komunës së Tetovës, Bilall Kasami, promovuan përfundimin e rikonstruksionit të rrugës “Shtipi”.
Sipas saj, projekti synon përmirësimin e sigurisë në komunikacion, qarkullimit dhe cilësisë së infrastrukturës për qytetarët e Tetovës.
Projekti, me vlerë mbi 17,5 milionë denarë, përfshiu rikonstruksionin e plotë të rrugës, ndërtimin e kanalizimit atmosferik dhe trotuareve, vendosjen e ndriçimit publik dhe sinjalistikës rrugore.
“Për vetëm dy vite qeverisje kemi siguruar mbi 7 milionë euro për realizimin e 29 projekteve infrastrukturore në territorin e Komunës së Tetovës”, deklaroi Zekolli.
Ajo theksoi se Qeveria mbetet e përkushtuar për vazhdimin e investimeve me të njëjtin ritëm, duke paralajmëruar promovimin e projekteve të tjera në Tetovë.
“Me VLEN, puna shihet në terren”, përfundoi Zekolli.
