Uashington, 29 korrik, Zhurnal.mk – Presidenti i SHBA-së, Donald Trump ka rënë dakord t’i japë Ukrainës licensa për prodhimin e raketave interceptuese “Patriot”, njoftoi dje në mbrëmje presidenti ukrainas, Volodymyr Zelensky.
Ky hap mund ta ndihmojë Kievin të rrisë prodhimin vendas të raketave të mbrojtjes ajrore, të cilat i konsideron jetike për t’u përballur me sulmet ruse.
“Sot patëm një takim shumë të mirë me presidentin Trump. Ai pranoi të na japë licensat”, tha Zelensky në një intervistë për “Fox News”.
Sistemet “Patrio” janë aktualisht mbrojtja e vetme efektive e Ukrainës kundër raketave balistike ruse.
Zelensky kishte paralajmëruar më herët këtë vit se vendi po përballej me mungesë të raketave interceptuese, ndërsa fushata ushtarake amerikane kundër Iranit ka shtuar më tej presionin mbi rezervat globale të këtij armatimi.
Më herët, pas takimit me Trump në Shtëpinë e Bardhë, Zelensky ishte shprehur më i rezervuar.
Ai bëri të ditur në një postim në platformën X se, me presidentin amerikan kishte diskutuar për forcimin e mbrojtjes ajrore të Ukrainës ndaj sulmeve raketore ruse.
“Diskutuam për licensat për prodhimin e raketave interceptuese “Patriot” dhe për disa ide të tjera që mund të ndihmojnë Ukrainën”, shkroi ai.
Edhe më herët këtë muaj, Trump deklaroi se Kievi do të merrte leje për të prodhuar raketa për sistemin e mbrojtjes ajrore “Patriot” në territorin ukrainas.
“Besoj se do ta realizojmë këtë marrëveshje. Do t’ju japim licensën për të prodhuar raketa “Patriot”, tha Trump pas takimit me Zelensky në samitin e NATO-s në Ankara.
Takimi i djeshëm, i zhvilluar me dyer të mbyllura, zgjati rreth një orë, sipas medieve amerikane.
Trump shkroi në platformën e tij “Truth Social” se bisedimet kishin shkuar “shumë mirë”, ndërsa edhe Zelensky e cilësoi takimin si “shumë të mirë” gjatë intervistës për “Fox News”.
