Sofje, 8 gusht Zhurnal.mk – Ministria e Punëve të Jashtme e Republikës së Bullgarisë ka shprehur shqetësim serioz lidhur me vendimin e fundit të Gjykatës në Koçan, e cila ka refuzuar kërkesën e 23-vjeçares Iva Mihajlova për t’u trajtuar në Bullgari. Mihajlova ka shtetësi të dyfishtë, maqedonase dhe bullgare, deklarohet si bullgare, ndërsa akuzohet për shkaktimin e një aksidenti trafiku me një viktimë. Ajo ka kërkuar që t’i kthehen pasaportat për të mundësuar trajtimin e shtyllës kurrizore të dëmtuar në Bullgari.
“Opinioni i institucionit shëndetësor kompetent lokal e përcakton qartë jo vetëm diagnozën e rëndë, por edhe pamundësinë për të siguruar trajtimin e përshkruar në Maqedoni dhe nevojën që ai të kryhet në një shtet tjetër. Këmbëngulim që Iva Mihajlova të ketë qasje në kohë dhe në kujdesin e duhur mjekësor, me qëllim shmangien e rrezikut real të invaliditetit të përhershëm, me pasoja të pakthyeshme për të drejtën e saj për një jetë dinjitoze”, thuhet në njoftimin e MPJ-së bullgare.
MPJ-ja e Bullgarisë e ka shfrytëzuar vendimin e djeshëm të Gjykatës së Koçanit, e cila refuzoi kërkesën e fundit të Mihajlovës për trajtim jashtë vendit, për të komentuar edhe rrugëtimin evropian të Maqedonisë së Veriut.
“Përkujtojmë se të gjitha shtetet nënshkruese të Konventës Evropiane për Mbrojtjen e të Drejtave të Njeriut dhe Lirive Themelore janë të detyruara të mbrojnë të drejtat e njeriut të qytetarëve të tyre. Në rastin e Iva Mihajlovës, theksojmë nevojën t’i kushtohet vëmendje respektimit të së drejtës për jetë, ndalimit të trajtimit çnjerëzor dhe poshtërues, si dhe sigurimit të mjeteve juridike efektive”, thuhet në deklaratën e MPJ-së bullgare.
“Në këtë drejtim, konstatimet e vazhdueshme negative të Komisionit Evropian për gjendjen e sistemit gjyqësor në Maqedoninë e Veriut nuk janë të rastësishme. Theksojmë se sundimi i ligjit është ndër kushtet kryesore për çdo përparim të një vendi kandidat drejt anëtarësimit në Bashkimin Evropian”, theksohet nga MPJ-ja në Sofje.
Rasti është shfrytëzuar edhe nga dy deputetë të partisë së djathtë proruse bullgare “Prerodba”, të cilët, pavarësisht se kanë ndalim hyrjeje në Maqedoninë e Veriut për shkak të kalimit të paligjshëm të kufirit, javën e kaluar e kanë kaluar kufirin te Dellçeva dhe kanë qenë të pranishëm në sallën e gjyqit në Koçan.
Deputetët Krsto Vraçev dhe Angel Georgiev kanë komentuar edhe procedurën gjyqësore, duke bërë deklarata fyese ndaj prokurorit, gjyqtarëve dhe shtetit ligjor.
Pas informacionit të publikuar nga Telma për kalimin e kufirit nga persona ndaj të cilëve ekziston ndalim hyrjeje me vendim gjyqësor, Ministria e Punëve të Brendshme njoftoi se, nëse konstatohen lëshime, do të ketë përgjegjësi për zyrtarët policorë kufitarë dhe se Kontrolli i Brendshëm do ta hetojë rastin.
