638
Shkup, 11 gusht, Zhurnal.mk – LSM-ja, punëdhënësit dhe përfaqësuesit e Qeverisë, edhe pas disa muajsh negociata në Këshillin Ekonomik-Social, nuk kanë arritur marrëveshje për rritjen e pagës minimale në 600 euro, si dhe për rritjen lineare të pagave të tjera për të paktën 100 euro.
Kryetari i LSM-së, Sllobodan Trendafilov, për MTV2 thotë se, pavarësisht ngecjes në negociata, sindikata nuk heq dorë nga kërkesat e saj. Sipas tij, rritja e pagës minimale është e domosdoshme për një jetë dinjitoze, pasi gjendja financiare e punëtorëve mbetet e vështirë.
“Ne vazhdimisht kërkojmë rritjen e pagës minimale. Por ajo që mund të them është se tri palët e tjera, respektivisht sindikatat e tjera, qeveria dhe punëdhënësit, nuk kanë pasur qëllim të negociojnë dhe të dakordohen për rritjen e pagës minimale dhe, përmes kësaj, edhe rritjen e pagave të tjera për të paktën gjysmën e fuqisë punëtore në vend, duke pasur parasysh se 70 për qind e numrit të përgjithshëm të punëtorëve tani marrin pagë nën 600 euro. Punëdhënësit gjatë gjithë kohës kanë si justifikim se po i rrisin pagat, por kjo ndodh për shkak të mungesës së fuqisë punëtore dhe për shkak se punëtorët maqedonas po largohen dhe po ndërtojnë ekonomitë e vendeve të tjera. Ndërsa qeveria thotë se i lë palët të merren vesh, por në të njëjtën kohë ka lidhur marrëveshje kolektive me një pjesë të madhe të sindikatave, përmes të cilave mund të rriten pagat e të punësuarve në sektorin publik”, deklaroi kryetari i LSM-së, Sllobodan Trendafilov.
Për rritjen e pagës minimale, deri tani LSM-ja ka organizuar tri protesta dhe bllokada të mëdha. Ndërkaq, takimi i fundit i Këshillit Ekonomik-Social u mbajt rreth një muaj më parë, ku përfaqësuesit e LSM-së dhe palët e tjera edhe një herë paraqitën kërkesat e tyre në tavolinë, por pa arritur marrëveshje. Por çfarë më tej? – Cili është plani i radhës i LSM-së? Si planifikon sindikata ta rrisë pagën minimale, e pyetëm Trendafilovin.
“Në Serbi të dhënat e fundit tregojnë se qeveria atje është e gatshme dhe do ta rrisë pagën minimale në të paktën 600 euro. Ne pyesim veten, çfarë presin këtu? Ne gjatë gjithë vitit kemi zhvilluar aktivitete për këtë çështje dhe kemi treguar se nuk i shmangemi as protestave dhe bllokadave, madje as grevave. Hapat e ardhshëm që do të ndërmarrim do të bazohen në vendimet e organeve dhe trupave të LSM-së”, u shpreh Trendafilov.
Pas disa takimeve të Këshillit Ekonomik-Social, ende nuk dihet kur do të mbahet takimi i radhës. Kryetari i LSM-së, Sllobodan Trendafilov, nuk pret epilog pozitiv, duke pasur parasysh dinamikën e deritanishme të negociatave.
Paga minimale aktualisht është 26.046 denarë. Qeveria ka propozuar rritje graduale deri në vitin 2028, ndërsa sindikalistët e konsiderojnë të pamjaftueshme, kurse punëdhënësit paralajmërojnë pasoja për bizneset nga një rritje e sforcuar.
