Shkup, 20 gusht, Zhurnal.mk – Ministri i Kulturës dhe Turizmit Sedat Sulejmani mbrëmë mori pjesë në koncertin me të cilin u përmbyll programi muzikor i edicionit të 66‑të të festivalit „Verë e Ohrit“.
Në fjalën e tij ai theksoi se festivali edhe këtë vit ofroi program të pasur dhe takime me artistë të shquar nga vendi dhe bota.
„Me paraqitjen e kuartetit „Glam“ nga Polonia dhe pianistit Sten Brekinrixh nga Shtetet e Bashkuara të Amerikës e përmbyllim programin muzikor të edicionit të 66‑të të festivalit „Verë e Ohrit“. Që nga nata e parë deri sot, Ohri ishte skenë ku u takuan kultura të ndryshme, tradita dhe shprehje artistike, nën qiell të hapur dhe në hapësira me histori shekullore. Kjo është thelbi i „Verës së Ohrit“ – përmes artit të lidhë njerëzit dhe të hapë horizonte të reja“, tha Sulejmani.
Ai u ndal te fillimi i edicionit të sivjetshëm të festivalit, i cili nisi me gala‑koncertin „Dashuri“, me paraqitjet e Ermonela Jahos nga Shqipëria dhe Çarls Kastronovos nga SHBA, në shoqërim të orkestrës së Operës dhe Baletit Kombëtar, nën dirigjimin e Marko Boemit.
„Ky edicion festivali la pas vetes numër të madh koncertesh, shfaqjesh dhe takimesh me artistë të shquar. Vizita rekord është vetëm konfirmim se publiku e njeh vlerën e festivalit dhe se kultura ka vend të rëndësishëm në shoqërinë tonë“, theksoi ministri.
Sulejmani nënvizoi se Ministria e Kulturës dhe Turizmit mbetet partner dhe mbështetje e festivalit, i cili për më shumë se gjashtë dekada është një nga shtyllat e jetës kulturore maqedonase.
„Detyra jonë është ta ruajmë këtë traditë, ta mbështesim cilësinë e lartë artistike dhe të krijojmë kushte që „Verë e Ohrit“ të vazhdojë të rritet, të zhvillohet dhe të jetë festival i hapur për të gjithë, për çdo gjeneratë, për çdo artist dhe për çdo dashamirës të artit“, tha Sulejmani.
Me koncertin u mbyll programi muzikor, ndërsa perdeja e edicionit të 66 të të „Verës së Ohrit“ do të ulet sonte me mjuziklin maqedonas „Kao kakao“, i frymëzuar nga muzika e Vllatko Stefanovskit.
