Shkup, 3 shtator, Zhurnal.mk – Kryetari i SDSM‑së, Venko Filipçe, deklaroi sot se Shtetet e Bashkuara të Amerikës, partneri strategjik i Maqedonisë së Veriut, tashmë janë të vetëdijshme se gjatë dy viteve të fundit në vend kanë hyrë para kineze. Ai përmendi huanë e marrë nga Hungaria, si dhe projektet e paralajmëruara në komunat e ministrit të vetëqeverisjes lokale, Ivan Stoilkovikj.
“Huaja që tani është objekt hetimi, huaja për shkak të së cilës e gjithë Evropa dhe bota e dinë se qeveria e udhëhequr nga Hristijan Mickoski është nën hetim dhe dyshohet për procese të paligjshme. Tani, kur edhe partnerët tanë strategjikë, SHBA, e dinë qartë se në vend po hyjnë dhe kanë hyrë para kineze gjatë dy viteve të fundit. Fillimisht përmes huasë që erdhi nga Hungaria, e tani përmes paralajmërimeve të ministrit për projekte në komuna”, akuzoi Filipçe.
Ai theksoi se huaja hungareze lidhet drejtpërdrejt me rritjen e borxhit publik, duke nënvizuar se qytetarët çdo ditë ndiejnë pasojat e politikave ekonomike të qeverisë.
“Qytetarët e dinë më së miri, çdo ditë nën qeverisjen e Hristijan Mickoskit jetojnë gjithnjë e më keq. Sa i dëshpëruar duhet të jetë dikush për të thënë se kanë trashëguar borxh 61,4% të BPV në vitin 2024, kur e vërteta është se borxhi u rrit në 61,4% të BPV pas huasë nga Hungaria prej 1 miliard euro”, theksoi Filipçe.
