Shkup, 3 shtator Zhurnal.mk – Ministria e Transportit, me mbështetjen e Bankës Botërore, ka siguruar 49 automjete për higjienën komunale, të blera me mjete të kursyera nga buxheti i Ministrisë, theksoi zëvendëskryeministri dhe ministri i Transportit, Aleksandar Nikoloski, në një intervistë për TV Kanal 5.
Ai theksoi se automjetet janë të destinuara për komunat më të mëdha dhe për Qytetin e Shkupit, ndërsa do t’u vihen në dispozicion edhe komunave në Rajonin e Shkupit.
Bëhet fjalë për lloje të ndryshme kamionësh për grumbullimin e mbeturinave, cisterna për larjen e rrugëve, si dhe automjete elektrike për pastrimin e tyre.
Pjesën më të madhe të automjeteve do ta marrë Qyteti i Shkupit, ndërsa një pjesë do të shpërndahen edhe në Kumanovë, Tetovë, Shtip, Veles, Strumicë, Prilep, Dibër, Kërçovë dhe Ohër. Nikoloski paralajmëroi se në periudhën e ardhshme do të mbështeten edhe komuna të tjera.
Vlera e parashikuar e prokurimit ishte 5,5 milionë euro, por automjetet janë blerë për 4,2 milionë euro, duke kursyer rreth 1,3 milionë euro. Sipas Nikolskit, mjetet e kursyera do të përdoren për mbështetjen e komunave të tjera.
