Shkup, 10 shtator, Zhurnal.mk – Mënyra se si përcaktohet paraburgimi është një nga treguesit më të rëndësishëm për respektimin e të drejtave të njeriut dhe sundimin e ligjit, theksoi ministri i Drejtësisë Jeton Shasivari në promovimin e “Udhëzuesit për zbatimin e masës së paraburgimit në prizmin e nenit 5 të Konventës Evropiane për të Drejtat e Njeriut”.
Sipas Shasivarit, udhëzuesi përbën një mjet praktik të rëndësishëm për gjyqtarët, prokurorët publikë, avokatët dhe profesionistët e tjerë juridikë, sidomos në drejtim të përmirësimit të praktikës gjyqësore dhe prokuroriale dhe zbatimit të qëndrueshëm të standardeve evropiane për mbrojtjen e të drejtave të njeriut.
“Kur flasim për paraburgimin, flasim për një nga pikat më të ndjeshme të procedurës penale – momentin kur shteti e kufizon një nga të drejtat më themelore të njeriut – të drejtën për liri”, theksoi Shasivari.
Ai nënvizoi se paraburgimi nuk duhet të përcaktohet automatikisht, as të përdoret si zëvendësim për vendim gjyqësor, duke veçuar rëndësinë e prezumimit të pafajësisë.
“Paraburgimi nuk duhet të bëhet instrument i automatizmit. Nuk duhet të bëhet zëvendësim për vendim gjyqësor. Dhe më e rëndësishmja – njeriu nuk duhet të trajtohet si fajtor para se të merret vendim i formës së prerë për fajësinë e tij”, porositi ministri i Drejtësisë.
Siç theksoi Shasivari, privimi nga liria mund të jetë i justifikuar vetëm kur ekziston arsye konkrete, reale dhe individualisht e përcaktuar, ndërsa qëllimi i procedurës nuk mund të arrihet me zbatimin e një mase më të butë.
“Çdo vendim për paraburgim duhet t’i përgjigjet një pyetjeje thelbësore: Pse pikërisht ky person, pikërisht tani dhe pikërisht në këto rrethana, duhet të privohet nga liria?”, tha ai.
Ministri vuri në dukje edhe rëndësinë e praktikës së Gjykatës Evropiane për të Drejtat e Njeriut në çështjet kundër Maqedonisë, si dhe nevojën që justifikimi i paraburgimit të vlerësohet vazhdimisht, jo vetëm në momentin kur ai përcaktohet.
Sipas tij, sundimi i ligjit nuk vlerësohet vetëm përmes efikasitetit të shtetit në zbulimin dhe ndjekjen e veprave penale, por edhe përmes mënyrës se si vepron kur kufizon të drejtën e dikujt për liri.
Udhëzuesi pritet të kontribuojë për siguri më të madhe juridike, arsyetim më cilësor të vendimeve dhe zbatim të harmonizuar të standardeve evropiane në praktikë.
Ministria e Drejtësisë, siç u theksua, do të vazhdojë të mbështesë iniciativat për përmirësimin e sistemit gjyqësor, forcimin e kapaciteteve profesionale dhe mbrojtjen e qëndrueshme të të drejtave të njeriut.
“Përgjegjësia jonë e përbashkët është të ndërtojmë një gjyqësor në të cilin qytetarët do të kenë besim dhe një sistem në të cilin të drejtat e njeriut nuk do të jenë vetëm të shkruara në ligje, por do të zbatohen në mënyrë të qëndrueshme në praktikë. Sepse drejtësia nuk është vetëm në marrjen e vendimit. Drejtësia është edhe në mënyrën se si merret ai vendim”, porositi Shasivari.
