Shkup, 15 shtator, Zhurnal.mk – Me mikpritjen e zëvendëskryeministrit të parë dhe ministrit për Çështje Evropiane, Bekim Sali, në Shkup mbahet Takimi Ndërrajonal i Kryenegociatorëve dhe Zyrtarëve të Lartë Përgjegjës për Integrimin Evropian. Takimi bashkon përfaqësues nga Ballkani Perëndimor, Ukraina, Moldavia dhe Gjeorgjia, si dhe përfaqësues të Bashkimit Evropian dhe partnerë ndërkombëtarë.
Në fokus janë e ardhmja e zgjerimit të Bashkimit Evropian, Korniza e ardhshme Financiare Shumëvjeçare dhe përshpejtimi i përafrimit me legjislacionin e BE-së përmes bashkëpunimit më efektiv ndërmjet qeverive dhe parlamenteve.
Në mesazhin e tij, Sali thekson se zgjerimi është investim strategjik në sigurinë, stabilitetin dhe prosperitetin e Evropës. Ai nënvizon se përkushtimi ndaj reformave duhet të shoqërohet me një proces të besueshëm dhe të parashikueshëm të anëtarësimit, në të cilin progresi vlerësohet sipas meritës.
Vëmendje e veçantë i kushtohet integrimit gradual dhe mundësive që qytetarët dhe bizneset të përfitojnë nga afrimi me BE-në edhe përpara anëtarësimit. Në këtë drejtim, Korniza e ardhshme Financiare Shumëvjeçare paraqet një mundësi të rëndësishme për të mbështetur reformat, forcimin e institucioneve dhe konvergjencën ekonomike.
Diskutimet trajtojnë gjithashtu rolin e parlamenteve në procesin e integrimit evropian, nevojën për koordinim të hershëm në përgatitjen e legjislacionit dhe rëndësinë e mbikëqyrjes parlamentare për cilësinë dhe zbatimin e reformave.
Takimi synon të forcojë shkëmbimin e përvojave dhe bashkëpunimin praktik ndërmjet institucioneve që udhëheqin procesin e integrimit evropian, si dhe të identifikojë fusha për bashkëpunim të mëtejshëm ndërrajonal.
Ministri Sali shpreh mirënjohje për pjesëmarrësit dhe partnerët, me falënderim të veçantë për Ambasadën e Republikës Federale të Gjermanisë dhe GIZ-in për mbështetjen në organizimin e takimit dhe për përkrahjen e vazhdueshme të rrugës evropiane.
