Shkup, 18 shtator Zhurnal.mk – Viktor Stojanov paralajmëron se përmes shitjes së kapelave, filxhanëve të kafesë dhe bluzave të markuara me emrin e fondacionit të tij bullgar „Maqedonia“, do të financojë rrjetin e mediave në Maqedoninë e Veriut, për të cilat, siç thotë vetë Stojanov, nevojiten të paktën 3.000 euro në muaj. Ndërkohë, ai thotë se qëllimi përfundimtar është formimi i një partie politike të bullgarëve në vend, e cila do të garojë në zgjedhjet e ardhshme parlamentare, të cilat sipas afatit të rregullt pritet të mbahen në vitin 2028, shkruan „Fokus“.
Në një video-mesazh, Stojanov ditët e fundit tha se tashmë janë në shitje bluza me logon e fondacionit me çmim prej 20 eurosh, ndërsa në periudhën e ardhshme do të dalin në shitje edhe bluza dimërore me çmim prej 25 eurosh, filxhanë porcelani për kafe dhe çaj me çmim prej 6 eurosh, si dhe kapele. Sipas tij, të ardhurat do të përdoren për financimin e aktiviteteve në Maqedoninë e Veriut, qëllimi përfundimtar i të cilave është formimi i një partie politike që, sipas tij, do të fitojë vende deputetësh dhe do të ketë ministra.
„Kemi shumë media në Maqedoninë e Veriut, duam edhe më shumë, duam t’i ndihmojmë bullgarët atje që të krijojnë një parti të tyre të fuqishme politike. Ky është qëllimi ynë i vjetër që nga viti 2021, por nuk kemi përparim në realizimin e tij për shkak të elitës së biznesit në Maqedoni, ndërsa pa biznes dhe kapital është e vështirë të krijohet një parti. Por tani kemi një ide se si ta realizojmë partinë pa biznes. Qëllimi është të marrim pjesë në zgjedhjet e ardhshme parlamentare në Maqedoni“, thotë Stojanov.
