Shkup, 24 shtator 2026 – Në vijim është operacioni policor i koduar “Filter”, i realizuar nga Drejtoria e Doganave, me qëllim zbulimin dhe shkatërrimin e një sistemi të organizuar për kontrabandë me cigare.
Në kuadër të aksionit janë arrestuar 13 persona, ndërsa pjesëtarët e Drejtorisë së Doganave kanë kryer bastisje në më shumë se 20 lokacione.
Sipas informacioneve të para, në aktivitetet e grupit të dyshuar janë përfshirë kompani të shpedicionit, kompani transporti dhe eksporti, persona fizikë, si dhe pjesëtarë të policisë dhe nëpunës doganorë.
Operacioni synon të zbardhë mënyrën e funksionimit të këtij sistemi të dyshuar dhe rolin e secilit prej personave të përfshirë.
Aksioni është ende në zhvillim, ndërsa autoritetet pritet të publikojnë më shumë detaje lidhur me të arrestuarit, veprat për të cilat dyshohen dhe rezultatet e bastisjeve.
