Edon Zhegrova po rikthehet te forma dhe versioni i tij që tifozët e Kosovës duan ta shohin.
Pas një kohe të gjatë, sulmuesi i Juventusit e nisi nga minuta e parë me fanellën e Kosovës në fitoren 1-0 ndaj Irlandës, duke zhvilluar një paraqitje më ekipore, më luftarake dhe me shumë angazhim në të dyja fazat e lojës.
Zhegrova qëndroi në fushë për 73 minuta dhe, përtej statistikave teknike, ajo që ra më shumë në sy ishte qasja e tij.
Ai luftoi për çdo top, u përfshi në duele dhe tentoi vazhdimisht të krijonte epërsi me driblimet e tij. Në total regjistroi 9 driblime, prej të cilave 6 të suksesshme, ndërsa pati edhe 17 duele në tokë, duke fituar 9 prej tyre.
Sulmuesi kosovar pati 51 prekje të topit, ndërsa provoi katër goditje drejt portës, dy prej të cilave u bllokuan dhe dy përfunduan jashtë.
Në aspektin e pasimeve, Zhegrova kompletoi 12 nga 20 tentimet, ndërsa realizoi pesë krosime, me dy prej tyre të sakta.
Ai kontriboi edhe në fazën defensive me dy topa të rikuperuar dhe një ndërhyrje të fituar.
Kjo paraqitje vjen në një moment mjaft interesant për Zhegrovën.
Pas dy ndeshjeve të para me Juventusin, ku ka arritur të shënojë dy gola dhe të dhurojë një asistim, ai u bashkua me Kosovën dhe menjëherë mori një rol titullari.
Paraqitja e tij mori vlerësim edhe nga përzgjedhësi Franco Foda, i cili theksoi se Zhegrova kishte kohë pa luajtur për një periudhë kaq të gjatë, si me klubin ashtu edhe me Kombëtaren.
“Në përgjithësi jam i kënaqur edhe me krahët. Edhe me Zhegrovën që luajti 70 minuta, pasi kishte kohë pa luajtur. Edhe me Batonin po ashtu jam i kënaqur”, deklaroi Foda pas fitores ndaj Irlandës.
Forma e tij në fillim të sezonit po jep sinjale pozitive dhe rikthimi në formacionin e Kosovës është një tjetër tregues i rëndësishëm.
Në duelin me Irlandën, Zhegrova nuk ishte vetëm lojtari që kërkonte të bënte diferencën me topin në këmbë. Ai ishte më i përfshirë në lojën e ekipit, më agresiv në duele dhe më i gatshëm të sakrifikonte për skuadrën.
Pikërisht këtë version të tij e kërkon Kosova – një Edon Zhegrova që kombinon talentin individual me angazhimin dhe lojën kolektive.
Sezoni sapo ka nisur, por sinjalet e para janë premtuese. Dy gola dhe një asistim me Juventusin, rikthim si titullar me Kosovën dhe një paraqitje me shumë angazhim ndaj Irlandës – Zhegrova po e nis në mënyrën më pozitive një sezon nga i cili priten shumë gjëra.
