Shkup, 7 tetor Zhurnal.mk – Gjykata Kushtetuese, në seancën e sotme, shfuqizoi një pjesë të dispozitës së Ligjit për mbrojtje sociale e cila parashikonte si kusht për realizimin e një të drejte që personi duhet të jetë i papunë, të mos marrë pension dhe të ketë mbushur moshën 60 vjeç për gratë, gjegjësisht 62 vjeç për burrat.
Në seancën e 24-të, Gjykata nisi një procedurë për vlerësimin e kushtetutshmërisë së nenit 34-c paragrafi 9 të Ligjit për Ndihmë Juridike Falas, me iniciativën e Oliver Davidovskit, si dhe një procedurë për vlerësimin e kushtetutshmërisë dhe ligjshmërisë së disa akteve të Agjencisë së mbikëqyrjes së sigurimeve që lidhen me kryerjen e aktiviteteve të ndërmjetësimit të sigurimeve.
Gjykata, nga ana tjetër, nuk nisi procedurë për vlerësimin e kushtetutshmërisë së nenit 157, paragrafi 8 të Kodit Penal, si dhe të nenit 461, paragrafët 2, 3 dhe 4 të Ligjit për procedurën kontestimore.
Për shkak të mungesës së shumicës, Gjykata nuk vendosi për propozimin për të filluar një procedurë për të vlerësuar kushtetutshmërinë e disa pjesëve të nenit 36 të Ligjit për mbrojtjen e fëmijëve, ndërsa hodhi poshtë iniciativën për nenin 38, paragrafi 3 të të njëjtit ligj.
Seanca hodhi poshtë edhe iniciativat për vlerësimin e kushtetutshmërisë dhe ligjshmërisë së Rregullores për të dhënat dhe dokumentacionin pedagogjik në shkollat e mesme.
