Kompania hapësinore SpaceX ka realizuar një tjetër demonstrim të rëndësishëm teknologjik, duke kapur për herë të parë në ajër anijen kozmike Starship, përmes krahëve gjigantë mekanikë të instaluar në platformën e lëshimit në Teksas.
Përpara kthimit në Tokë, Starship qëndroi për afro 24 orë në hapësirë, ku kreu edhe vendosjen në orbitë të 26 satelitëve Starlink.
Pas përfundimit të misionit, anija kozmike u rikthye në vendin e lëshimit, ku u kap nga krahët mekanikë të kullës, pak para se të prekte tokën. Kjo manovër përbën një hap të rëndësishëm në synimin e SpaceX për të zhvilluar një sistem plotësisht të ripërdorshëm të transportit hapësinor.
Deri më tani, kompania e Elon Musk kishte realizuar me sukses këtë lloj kapjeje vetëm me fazën e parë të raketës, përforcuesin Super Heavy.
Kapja e vetë anijes Starship synon të lehtësojë rikuperimin e saj pas misioneve hapësinore, duke reduktuar kohën dhe kostot e përgatitjes për fluturimet e ardhshme.
Ky zhvillim konsiderohet një moment i rëndësishëm në programin Starship, i cili synon të mundësojë misione gjithnjë e më të avancuara në hapësirë, përfshirë udhëtimet drejt Hënës dhe Marsit.
