Andrew Garfield dikur mbështeti idenë që Spider-Man të ishte homoseksual dhe, 13 vjet më vonë, ai ende beson se superheroi i njohur mund të “pëlqejë djemtë”.
Aktori britanik ka ritheksuar qëndrimin e tij se personazhi i Marvel është një figurë gjithëpërfshirëse dhe se çdokush mund ta shohë veten në të.
“Unë ende besoj se çdokush mund të jetë brenda atij kostumi”, tha ai në një intervistë për Entertainment Weekly.
“Pikërisht kjo është arsyeja pse ai është një personazh kaq i dashur universalisht… sepse nuk sheh ngjyrën e lëkurës, nuk sheh gjininë, nuk sheh orientimin seksual. Çdokush mund ta projektojë veten në atë kostum”, shpjegoi ai.
Garfield, 43 vjeç, luajti rolin e Peter Parker dhe alter egos së tij në filmin “The Amazing Spider-Man” të vitit 2012, si dhe në vazhdimin e tij të vitit 2014.
Suksesi i këtyre filmave e pozicionoi atë ndër aktorët më të kërkuar në Hollywood.
Garfield e përshkroi deklaratën e tij të vitit 2013, kur kishte kërkuar një Spider-Man homoseksual, si “një akt rebelimi”, duke thënë se në atë kohë “e ndiente shumë fort këtë ide”.
“Më pëlqen ideja e një hapësire ku të gjithë respektohen dhe të gjithë përfshihen. Ishte thjesht një mënyrë për të thënë: ‘Pse jo?’ Dhe nëse ke një mendim shumë të fortë në njërën apo tjetrën anë, atëherë po tregon diçka për veten”, u shpreh ai.
Garfield, i cili aktualisht po promovon filmin e tij të ri historik, “The Uprising”, u largua nga seria e filmave “Spider-Man” pasi Marvel e riformatoi ekskluzivitetin për ta lidhur me universin e filmave “Avengers” dhe zgjodhi Tom Holland në rolin e Spider-Man.
Në vitin 2013, Garfield kishte treguar për Entertainment Weekly se kishte shkuar deri aty sa të diskutonte me producentin e “The Amazing Spider-Man”, Matt Tolmach, mundësinë e ndryshimit të historisë së dashurisë së Peter Parkerit, duke përfshirë edhe ndryshimin e gjinisë së personazhit Mary Jane.
“Pse të mos zbulojmë se Peter po eksploron seksualitetin e tij?”, kishte thënë ai në atë kohë.
“Nuk është as diçka novatore! … Atëherë, pse të mos jetë homoseksual? Pse të mos pëlqejë djemtë?”
