Shkup, 16 shkurt – Sa i përket mundësisë së përdorimit të inteligjencës artificiale në sektorin publik, duhet të jemi të vetëdijshëm se po vjen një epokë në të cilën, pa inteligjencën artificiale, nuk do të jemi në gjendje ta kuptojmë zhvillimin e institucioneve tona në sektorin publik, as zhvillimin në sektorin privat, as jetën dhe të folurit tonë të përditshëm, tha sot kryerevizori shtetëror Maksim Acevski në debatin publik pas raportit përfundimtar të ESHR-së për revizionin e kryer të suksesit me temë: “Mundësia e përdorimit të inteligjencës artificiale në sektorin publik”.
Acevski tha se qëllimi i vetë revizionit ishte të përcaktonte nëse sektori publik është i gatshëm të përdorë IA-në, me fokus në kornizën strategjike dhe aktet ligjore, burimet njerëzore, harduerin dhe softuerin për përdorimin e IA-së, si dhe nivelin e mbrojtjes së të dhënave personale. Ai tha se shteti po ndërmerr aktivitete në këtë drejtim, por shtoi se nevojiten aktivitete shtesë për të përmirësuar situatën.
“Ajo që është thelbësore për aktorët në këtë fushë është të sigurohet vazhdimësia dhe qëndrueshmëria e vetë produkteve, të cilat do të zhvillohen me projekte të caktuara, sepse kemi një situatë në të cilën në periudhën e mëparshme u investua një sasi mjaft e madhe fondesh në projekte të caktuara, të cilat, për fat të keq, nuk zbatohen më në sektorin publik. Gjatë vitit 2023, patëm një investim prej 150,000 eurosh në një asistent artificial – ADA, i cili u promovua, por, për fat të keq, nuk funksionon sot”, theksoi Acevski.
Ministri i Transformimit Digjital, Stefan Andonovski, theksoi se ESHR-ja, në raportin e saj përfundimtar të revizionit të suksesit, arriti në përfundimin se në periudhën e analizuar, sektori publik nuk kishte një kornizë të plotë strategjike të infrastrukturës ligjore për zbatimin sistematik të IA-së, dhe shtoi se Ministria që ai drejton po i merr seriozisht këto gjetje në konsideratë si bazë për përmirësimin institucional.
“Strategjia Kombëtare e TIK-ut në shtyllën e katërt e pozicionon IA-në si një bosht strategjik teknologjik, që do të thotë një nga katër themelet mbi të cilat bazohet transformimi digjital”, tha Andonovski, i cili theksoi se ky dokument shoqërohet me një plan veprimi për zbatimin e IA-së për administratën publike, i cili integron teknologji të vlefshme në zhvillimin institucional.
Ai tha se një pjesë e strategjisë është edhe miratimi i një kuadri strategjik, ekskluzivisht për përdorimin e Inteligjencës Artificiale, e cila është në përgatitje e sipër dhe për të cilën është formuar tashmë një grup pune.
Për vërejtjet në lidhje me Portalin kombëtar për të dhëna të hapura, tha se kanë integruar IA asistent, kanë mundësuar zbatimin e gjuhës natyrore dhe kanë rritur përdorshmërinë praktike të të dhënave të hapura.
Deputeti i LSDM-së, Dimitar Kovaçevski e përshëndeti këtë debat publik dhe theksoi se diskutimet në këtë temë duhet të vazhdojnë, por që beson se kjo duhet të jetë një proces më i gjerë në nivel të institucioneve, ndërmarrjeve publike, ministrive në një strategji të zbatuar gjithëpërfshirëse.