Kryetari i Partisë Demokratike të Kosovës (PDK), Bedri Hamza, ka mbajtur takim me kryeministrin Albin Kurti lidhur me çështjen e presidentit gjatë së dielës.
Një gjë të tillë e ka bërë të ditur vetë Hamza me anë të një njoftimi në ‘Facebook’, ku tha se PDK’ja nuk mbështet kandidatura që s’përfaqësojnë unitetin qytetar.
Njoftimi i plotë:
Zgjedhja e Presidentit nuk është çështje vetëm e një partie, por e të gjithë neve si përfaqësues të zgjedhur të popullit. Për këtë arsye, sot iu përgjigja pozitivisht ftesës së z. Kurti për të diskutuar për zhvillimet politike dhe procesin e zgjedhjes së Presidentit të ri të vendit.
Si subjekt politik opozitar, nuk kemi qenë dhe nuk jemi pengesë e proceseve shtetërore, por as nuk mbështesim kandidatura që nuk përfaqësojnë unitetin qytetar, sipas frymës kushtetuese.
Uroj që të ketë reflektim nga ata që e kanë përgjegjësinë kushtetuese për të propozuar kandidatura me mbështetje të gjerë, duke shmangur kalkulimet afatshkurtra partiake. Stabiliteti institucional është jetik dhe duhet të trajtohet si i tillë.
