Kenia, 28 korrik Zhurnal.mk – Autoritetet në Kenia kanë nisur një hetim urgjent pas zbulimit të 14 elefantëve të ngordhur pranë Parkut Kombëtar Amboseli, në jug të vendit.
Shërbimi i Jetës së Egër të Kenias (KWS) bëri të ditur se ekspertët kanë kryer ekzaminimet e para në terren, ndërsa mostrat e indeve janë dërguar në laborator për të përcaktuar nëse vdekjet janë shkaktuar nga ndonjë sëmundje, helmim apo faktorë të tjerë.
Parku Kombëtar Amboseli dhe zonat përreth përbëjnë një nga ekosistemet më të rëndësishme të jetës së egër në Afrikë, përgjatë kufirit me Tanzaninë. Sipas autoriteteve, është hera e parë në disa dekada që regjistrohet një numër kaq i lartë elefantësh të ngordhur në këtë zonë, ku gjuetia e paligjshme është reduktuar ndjeshëm.
KWS thekson se deri më tani nuk ka prova që tregojnë një shkak të vetëm për ngordhjen e kafshëve.
Mes elefantëve të gjetur të pajetë ka individë të moshave dhe gjinive të ndryshme, çka tregon se fenomeni nuk ka prekur vetëm një tufë apo një grup të caktuar. Zyrtari i komunikimit i KWS, Duncan Wanyama, deklaroi se kufomat u zbuluan në disa pika të ndryshme, 15 deri në 30 kilometra larg kufijve të Parkut Kombëtar Amboseli.
Sipas të dhënave të organizatës Amboseli Trust for Elephants, e cila monitoron popullatën e elefantëve në zonë, gjatë vitit 2025 në ekosistemin Amboseli jetonin mbi 2 mijë elefantë.
