Tiranë, 30 prill, Zhurnal.mk – Kreu i grupit parlamentar të Partisë Socialiste, Taulant Balla u shpreh sot, se “SPAK po çmonton korrupsionin shumëvjeçar në Shqipëri”.
I pyetur nga gazetarët jashtë dyerve të godinës së Gjykatës për Korrupsionin dhe Krimin e Organizuar (GJKKO), ku ishte i pranishëm në cilësinë e kallëzuesit për çështjen “Partizani”, Balla tha se politikanët që shkojnë në SPAK duhet të mbështesin drejtësinë.
“Ditë e madhe për Shqipërinë. Politikanët që vijnë këtu duhet që të mbështesin drejtësinë, punën e SPAK që po çmonton korrupsionin shumëvjeçar në Shqipëri”, tha Balla.
“Në gjë është e sigurt, se këtij kallëzimi i qëndroj fjalë për fjalë. Një familjari i yti shkon dhe u premton se do t’u kthehet prona dhe ua merr atë më lirë. Sot po flasim për korrupsion”, pohoi ai.
Në GJKKO mbahet sot seanca e radhës për dosjen “Partizani” me të pandehur ish-kryeministrin Sali Berisha, dhëndrin e tij Jamarbër Malltezi e të tjerë, për privatizimin e kompleksit “Partizani”.
Gjykata e Posaçme Antikorrupsion ka pranuar kërkesën e SPAK për thirrjen në gjyq të 11 dëshmitarëve. Në seancën e sotme pritet të dëshmojnë tetë prej tyre, duke nisur nga deputeti i PS-së Taulant Balla, në cilësinë e kallëzuesit të çështjes.
