Shkup, 18 qershor, Zhurnal.mk – Bashkimi Demokratik për Integrim (BDI) ka reaguar ndaj zhvillimeve të fundit lidhur me vendimin e Gjykatës Kushtetuese për emërtimet e rrugëve në Tetovë, duke akuzuar koalicionin VLEN se po shmang përgjegjësinë dhe po merret me sulme politike ndaj opozitës.
Sipas BDI-së, në vend që të japë llogari për, siç thotë, rikthimin e emrave të periudhës jugosllave dhe shfuqizimin e emërtimeve me përmbajtje e simbolikë shqiptare në Tetovë, VLEN vazhdon të përsërisë akuza ndaj kësaj partie.
“Në vend që të japin llogari se si u lejua rikthimi i emrave të periudhës jugosllave dhe zhbërja e një pjese të identitetit historik shqiptar në Tetovë, ata vazhdojnë të kërkojnë fajtorë aty ku nuk janë. Kjo është dëshmi e mungesës së vizionit, guximit dhe përgjegjësisë politike”, thuhet në reagim.
BDI më tej thekson se ndërkohë që, sipas saj, VLEN nuk e sheh problem drejtimin që po merr shteti, Parlamenti Evropian në raportin e tij të fundit ka ritheksuar shqetësimet për ndikimin e konceptit të ashtuquajtur “Botë Serbe” në Maqedoninë e Veriut dhe në rajon.
Partia opozitare akuzon VLEN-in se nuk ka reaguar ndaj, siç i quan, përpjekjeve për dobësimin e mekanizmave që garantojnë të drejtat e shqiptarëve, duke përmendur Balancuesin, mekanizmin e Badenterit, pozitën e gjuhës shqipe dhe vendimin e fundit për emërtimet e rrugëve në Tetovë.
“Parlamenti Evropian e sheh. Shqiptarët e shohin. Opinioni publik e sheh. Vetëm VLEN nuk e sheh”, thuhet në deklaratën e BDI-së.
Në fund të reagimit, BDI thekson se do të vazhdojë të mbrojë të drejtat e fituara të shqiptarëve, identitetin kombëtar dhe frymën e Marrëveshjes së Ohrit, pavarësisht, siç shprehet, përpjekjeve për zbehjen e arritjeve historike të shqiptarëve.
