Bruksel, 21 tetor, Zhurnal.mk – Komisioni Evropian ka nisur një hetim për të verifikuar nëse platforma e rezervimeve turistike online “Booking.com” ka shkelur ligjet e Bashkimit Evropian, duke mos marrë masat e duhura kundër ofertave të rreme dhe mashtrimeve në internet.
“Evropianët duhet të jenë në gjendje të rezervojnë pushimet e tyre pa pasur frikë se do të mashtrohen”, deklaroi sot zëvendëspresidentja e Komisionit Evropian, Henna Virkkunen.
“Ligjet e BE-së përcaktojnë përgjegjësitë e platformave për t’u përballur me këto rreziqe. Ne duhet të sigurohemi që platforma kryesore e rezervimeve në Evropë, t’i marrë seriozisht këto përgjegjësi”, tha Virkkunen.
Komisioni dyshon se “Booking.com” ka shkelur Aktin e Shërbimeve Digjitale të BE-së (DSA), pasi nuk ka trajtuar siç duhet përmbajtjet e paligjshme në platformën e saj dhe nuk ka arritur të heqë ofertat e rreme.
“Ofertat e rreme, si ato për prona që nuk ekzistojnë, mashtrimet kur dikush hiqet si një person apo biznes tjetër, si dhe ofertat e akomodimit që nuk përmbushin rregullat, mund të dëmtojnë mbrojtjen e konsumatorëve”, thuhet në njoftimin për shtyp të Komisionit.
Hetimi synon gjithashtu të verifikojë nëse “Booking.com” ka bërë mjaftueshëm për të mbrojtur përdoruesit nga mashtrimet përmes mesazheve dhe lidhjeve të rreme, të cilat synojnë të vjedhin të dhëna personale dhe informacione të tjera të ndjeshme.
Komisioni do të shqyrtojë mënyrën se si të dhënat e rezervimeve dhe të klientëve u shpërndahen pronarëve të hoteleve dhe strukturave të tjera akomoduese, si dhe mënyrën se si funksionon sistemi i mesazheve të “Booking.com”.
Ai do të vlerësojë nëse masat mbrojtëse të platformës janë të mjaftueshme për të parandaluar keqpërdorimin e këtyre të dhënave.
Hetimi do të përfshijë edhe mundësinë e shkeljes së rregullave për transparencën e reklamave.
Strukturat akomoduese mund të paguajnë komisione më të larta për t’i bërë ofertat e tyre më të dukshme në “Booking.com”.
Megjithatë, Komisioni Evropian dyshon se këto oferta nuk dalloheshin qartë si reklama me pagesë.
Nëse hetimi arrin në përfundimin se “Booking.com” ka shkelur Aktin e Shërbimeve Digjitale të BE-së, Komisioni Evropian mund t’i vendosë platformës një gjobë.
