Këngëtarja e njohur amerikane Britney Spears është arrestuar në shtetin e Kalifornisë nën dyshimin për drejtim automjeti në gjendje të dehur (DUI).
Sipas të dhënave të konfirmuara nga revista “People”, Spears, 44 vjeç, u arrestua dje në mbrëmje nga policia, në qytetin e Ventura-s, dhe u lirua në orët e para të mëngjesit të sotëm.
Regjistrat e arrestimit nga Ventura County Sheriff’s Office tregojnë se këngëtarja u arrestua nën dyshimin për drejtim mjeti në gjendje të dehur. Sipas burimeve të zbatimit të ligjit, procedura u klasifikua si “cite and release”, që do të thotë se ajo u lirua pasi mori një njoftim për t’u paraqitur në gjykatë.
Spears pritet të dalë para gjykatës për këtë incident, më 4 maj. Lajmi për arrestimin u raportua fillimisht nga portali TMZ.
Autoritetet nuk kanë dhënë ende detaje shtesë mbi rastin, ndërsa përfaqësuesit e këngëtares nuk kanë reaguar menjëherë ndaj kërkesave për koment.
Ndërkohë, vëmendje ka tërhequr edhe fakti se Spears duket se ka fshirë llogarinë e saj në Instagram gjatë kësaj jave, pas një periudhe diskutimesh në internet për videot e saj në rrjetet sociale.
Arrestimi vjen pas një periudhe të trazuar në jetën e këngëtares. Në vitin 2021, një gjykatës në Los Anxhelos i dha fund kujdestarisë ligjore 13-vjeçare të Spears ndaj dy djemve të saj.
Muajin e kaluar u konfirmua gjithashtu se ajo ka shitur katalogun e saj muzikor, megjithëse shuma e marrë nuk është bërë publike.
Së fundmi, Spears ka folur hapur edhe për marrëdhëniet e vështira me familjen e saj.
Në një postim në Instagram në shkurt, ajo shkroi se ndjehej e izoluar dhe e lënduar nga mënyra se si ishte trajtuar në të kaluarën, duke shtuar se ndihej “me fat që ishte ende gjallë” pas përvojave që kishte kaluar.
