Shkup, 25 shtator, Zhurnal.mk – Bullgaria mbetet e hapur për dialog konstruktiv me Maqedoninë e Veriut, ndërsa procesi i anëtarësimit të vendit është çështje evropiane – kjo thuhet në qëndrimin e Ministrisë së Punëve të Jashtme në lidhje me deklaratën e ministrit të jashtëm Timço Mucunski se Maqedonia dëshiron të ketë ndërmjetës nga Bashkimi Evropian në bisedimet me Sofjen zyrtare, transmeton Televizioni Kombëtar Bullgar.
Ministria e Punëve të Jashtme atje thekson se anëtarësimi i Maqedonisë është çështje që duhet të shqyrtohet në kuadër të institucioneve evropiane.
“Vendi ynë e mbështet punën e Komisionit Evropian gjatë negociatave me të gjitha vendet kandidate”, thuhet në qëndrim, duke kujtuar se marrëdhëniet e fqinjësisë së mirë janë kusht themelor për përparim.
Një numër i madh kandidatësh po përparojnë në situatë globale të ndërlikuar, theksohet në qëndrim, ndërsa përsëri shprehet pritja që Maqedonia t’i përmbushë obligimet e saj. Në një intervistë nga Nju Jorku, Timço Mucunski thekson se ekziston një mungesë fundamentale e besimit mes Sofjes dhe Shkupit dhe shton se nuk ka pasur bisedime pune mes delegacioneve maqedonase dhe bullgare në Asamblenë e Përgjithshme të OKB‑së.
“Për ne është e rëndësishme që në të gjitha bisedimet që do t’i zhvillojmë me Bullgarinë në të ardhmen, të ketë edhe pjesëmarrje të Bashkimit Evropian”, tha Mucunski. Ai precizoi se nuk ka rëndësi nëse kjo do të jetë pjesëmarrje e vendeve të veçanta anëtare apo e institucioneve evropiane, por është e rëndësishme “të ketë të paktën edhe një vend tjetër në këtë proces” që do të ndihmojë në ndërtimin e besimit.
