Kanë mbetur vetëm 48 orë nga dita zyrtare e votimit për zgjedhjet e mesmandatit nw SHBA më 3 nëntor.
Ky proces, i cili konsiderohet gjerësisht si një referendum mbi dy vitet e para të mandatit të dytë të Presidentit Donald Trump, pritet të riformësojë plotësisht balancën e pushtetit në Uashington dhe të përcaktojë fatin e axhendës së tij politike deri në vitin 2028.
Në lojë janë të gjitha 435 vendet e Dhomës së Përfaqësuesve, 35 nga 100 ulëset e Senatit, si dhe 36 poste guvernatorësh anembanë vendit.
Sipas të dhënave të fundit nga platformat e gjurmimit elektoral, mbi 52 milionë amerikanë kanë hedhur tashmë votën e tyre përmes postës ose qendrave të votimit të parakohshëm. Kjo shifër ka thyer çdo parashikim, duke lënë pas rekordin prej 46 milionë votash të regjistruara në zgjedhjet e ngjashme të vitit 2022.
Vëmendjen kryesore po e merr shteti tradicionalisht konservator i Teksasit, ku mbi 7.4 milionë qytetarë (afro 39% e votuesve të regjistruar) kanë votuar para kohe. Ky mobilizim masiv, veçanërisht në qendrat e mëdha urbane si Houston dhe Dallas, po interpretohet nga analistët si një sinjal i fortë i dëshirës së qytetarëve për të ndikuar në kursin politik të vendit.
Ky cikël elektoral ka thyer çdo rekord financiar, duke u shndërruar në zgjedhjet më të kushtueshme në historinë moderne të SHBA-së. Shuma totale e shpenzuar për fushata dhe reklama televizive e digjitale ka arritur shifrën marramendëse prej të paktën 11.6 miliardë dollarësh, duke tejkaluar madje edhe shpenzimet e fushatës presidenciale të dy viteve më parë.
Beteja në prapaskenë po udhëhiqet nga emra të njohur të botës së biznesit. Elon Musk mbetet donatori më i madh në kampin republikan me një mbështetje që kalon 446 milionë dollarë.
Nga ana tjetër, ish-kryebashkiaku i Nju Jorkut, Michael Bloomberg, ka hyrë fuqishëm në lojë në ditët e fundit, duke injektuar 116 milionë dollarë për organizatat dhe kandidatët demokratë.
Ndërkohë, gara individuale më e nxehtë po zhvillohet në Teksas, ku demokrati James Talarico, i cili po sfidon republikanin Ken Paxton për Senatin, ka thyer çdo rekord duke mbledhur i vetëm rreth 150 milionë dollarë.
Përballë sondazheve kombëtare që tregojnë një rënie të popullaritetit të tij në nivelin 40% dhe një avantazh të lehtë të demokratëve, Presidenti Donald Trump ka intensifikuar maksimalisht agjendën e tij.
Gjatë fjalimeve të tij, ai u ka bërë thirrje mbështetësve të tij: “Shtiruni sikur emri im është në fletën e votimit”, ndërsa ka premtuar lehtësime të reja fiskale për pensionet dhe bakshishet.
