Dibër, 6 janar – Kryetari i Komunës së Dibër, Fisnik Mela, ka përgëzuar Genc Sadikun për emërimin në detyrën e drejtorit të shkollës fillore “Penestia”, shkolla më e madhe nëntëvjeçare në Dibër.
Në deklaratën e tij publike, Mela thekson se ky emërim bart një përgjegjësi të madhe, por edhe një mundësi të rëndësishme për avancimin e mëtejmë të cilësisë së arsimit, forcimin e menaxhimit institucional dhe rritjen e bashkëpunimit mes shkollës, mësimdhënësve, nxënësve dhe prindërve.
“Jam i bindur se z. Sadiku do ta ushtrojë këtë detyrë me profesionalizëm, përkushtim dhe vizion, duke kontribuar drejtpërdrejt në zhvillimin arsimor dhe edukativ të brezave të rinj të Dibrës”, theksoi kryetari i komunës.
Ai i uroi suksese drejtorit të ri në këtë detyrë të rëndësishme dhe shprehu gatishmërinë e Komunës së Dibrës për bashkëpunim të vazhdueshëm me institucionet arsimore, në funksion të përmirësimit të kushteve dhe standardeve në arsim, si dhe në shërbim të qytetarëve të komunës.
