Tiranë, 24 prill, Zhurnal.mk – Ministri për Evropën dhe Punët e Jashtme, Ferit Hoxha deklaroi sot se zgjerimi i Bashkimit Europian në Ballkanin Perëndimor nuk është thjesht një zgjedhje politike, por një domosdoshmëri strategjike që forcon sigurinë, besueshmërinë dhe qëndrueshmërinë afatgjatë të Evropës.
Në kuadër të Forumit Ekonomik të Delfit, Hoxha mori pjesë në panelin e diskutimit “Nga ‘Fuqia e Butë’ te ‘Realiteti i Vështirë’: Ribalancimi i Madh Evropian”, ku u trajtuan realitetet e reja që po formësojnë kontinentin tonë.
Ministri Hoxha theksoi se teksa Evropa po përshtatet me një botë gjithnjë e më të paparashikueshme, po shfaqet nevoja për të ruajtur atë që përcakton Evropën, vlerat e saj, dhe hapjen ndaj botës, duke forcuar njëkohësisht kapacitetin për të mbrojtur interesat e saj në nivel global.
“Kjo nënkupton një Evropë më strategjike, më rezistente dhe më të aftë. Një Evropë që ndërthur veçantinë dhe vlerat e saj të padiskutueshme me aftësinë për t’i zbatuar dhe mbrojtur ato”, tha Hoxha.
Hoxha theksoi se “Shqipëria e ka bërë zgjedhjen e saj: të jetë pjesë e Evropës, të përqafojë vlerat e saj dhe të kontribuojë si pjesë integrale e interesave të përbashkëta evropiane”.
“Ne mbetemi plotësisht të angazhuar që, sot dhe në të ardhmen, të bëjmë gjithçka që është në fuqinë tonë për të kontribuar për një Evropë më të fortë, më të bashkuar dhe më efikase”, deklaroi Hoxha.
