Shkup, 30 korrik Zhurnal.mk – Pas një viti në krye të Agjencisë Nacionale për Programe Arsimore Evropiane dhe Mobilitet, por me plot 15 vjet përvojë brenda institucionit, drejtoresha mr. Ana Mihajlov në një intervistë ekskluzive për Lideri.mk bën bilancin e një periudhe që e cilëson si vit të rikthimit të besimit, rritjes së rezultateve dhe forcimit të meritokracisë.
Nga rikthimi i besimit të humbur te Komisioni Evropian dhe përfituesit, te shfrytëzimi rekord i fondeve evropiane, puna intensive në terren dhe zgjerimi i mundësive për të rinjtë në çdo cep të vendit, Mihajlov flet për transformimin e Agjencisë dhe vizionin e saj për një institucion modern, transparent dhe të hapur për të gjithë.
Në këtë intervistë ajo ndan sfidat, arritjet dhe planet për të ardhmen, duke theksuar se programi Erasmus+ nuk duhet të jetë privilegj i disa individëve, por një mundësi reale për çdo të ri që dëshiron të mësojë, të zhvillohet dhe të ndërtojë të ardhmen e tij.
Cili është suksesi apo “pika e kthesës” më domethënëse për të cilën jeni më krenare si drejtuese e Agjencisë Nacionale për Programe Arsimore Evropiane dhe Mobilitet?
Mihajllov: Për mua, ky ishte një vit i mbushur me shumë arsye për krenari. Me 15 vjet përvojë të mëparshme si e punësuar në Agjencinë Nacionale, udhëheqja ime mbështetet në njohjen e thellë të sistemit nga brenda. Falë kësaj, që në fillim, pa pasur nevojë për përshtatje shtesë, munda të nis menjëherë zbatimin efikas të ndryshimeve të nevojshme.
Përmes punës së përbashkët dhe ndërtimit të besimit të ndërsjellë me ekipin, pata mundësinë t’i përmirësoj drejtpërdrejt të gjitha ato procese për të cilat më herët kisha vërejtur se kishin hapësirë për përparim.
Si sukses kyç gjatë vitit të kaluar do të veçoja rritjen e konsiderueshme të shkallës së shfrytëzimit të fondeve evropiane përmes programit Erasmus+ dhe Korpusit Evropian të Solidaritetit. Nëpërmjet kësaj siguruam mundësi të drejtpërdrejta për një numër dukshëm më të madh qytetarësh tanë.
Sot, Agjencia Nacionale ka një profil të dallueshëm, një imazh prestigjioz dhe vëmendje të sinqertë ndaj potencialit arsimor dhe krijues maqedonas, gjë që dëshmohet më së miri nga reagimet pozitive të përfituesve dhe aplikantëve potencialë. Arritëm ta rrisim dukshëm cilësinë e projekteve, duke u mundësuar institucioneve tona që më në fund të jenë partnerë të barabartë dhe aktivë në rrjetet evropiane. Por, sigurisht, nuk ndalemi këtu; ky është vetëm fillimi.
Cila ishte sfida më e madhe me të cilën u përballët gjatë këtij viti të parë dhe si arritët ta kapërcenit?
Mihajllov: Fillimi ishte jashtëzakonisht i vështirë, para së gjithash sepse më herët ishte humbur besimi, si te Komisioni Evropian dhe institucionet, ashtu edhe te përfituesit, gjë që për ne ka rëndësinë më të madhe. Megjithatë, me punë të palodhur dhe përkushtim, e rikthyem atë besim hap pas hapi; dhe kjo është diçka për të cilën jam vërtet shumë krenare.
Kjo pozitë sjell sfida të mëdha, por në jetë dhe në punë udhëhiqem gjithmonë nga parimet etike. Arrita të vendos në Agjencinë Nacionale një sistem të bazuar në meritokraci. Kur puna organizohet në mënyrë të përsosur, presionet e jashtme thjesht nuk gjejnë hapësirë, ndërsa kriteri i vetëm bëhet cilësia e vetë idesë dhe e projektit.
Një sfidë shtesë për mua ishte ta thyeja paragjykimin se funksioni i drejtoreshës nënkupton vetëm “dhënie urdhrash nga lart”. Udhëheqja nuk është imponim, por përgjegjësi. Prandaj, çdo ditë përpiqem të jem shembull dhe t’i ofroj mbështetje ekipit tim, sepse vetëm kështu ndërtohet një sukses i qëndrueshëm dhe i përbashkët.
Besoj se besimi ndërtohet vetëm përmes veprimeve konsekuente. Qëllimi im është që çdo aplikant të ndihet i sigurt dhe ta dijë se puna e tij vlerësohet siç duhet, ndërsa treguesi më i madh i suksesit tonë janë pikërisht historitë e shumta të suksesit të përfituesve tanë gjatë vitit të kaluar.
Cili ishte fokusi juaj kryesor gjatë vitit të kaluar?
Mihajllov: Pa dyshim, fokusi ishte te demistifikimi i rregulloreve evropiane, transparenca e plotë dhe shfrytëzimi i përgjegjshëm i fondeve evropiane.
Vizioni im është që programi Erasmus+ dhe të gjitha mundësitë evropiane të mos jenë privilegj vetëm për disa, por të bëhen realisht të qasshme për këdo që ka dëshirë dhe potencial për përparim. Pikërisht për këtë arsye, bashkë me ekipin tim jemi vazhdimisht në terren; nuk presim që përfituesit të vijnë tek ne për t’u informuar.
Nuk jam një drejtore që rri e mbyllur në zyrë. Jemi të pranishëm edhe në vendbanimet më të vogla, me qëllim që t’ua ofrojmë nga afër të gjitha mundësitë atyre që kanë një ide të mirë dhe duan të bëhen përfituesit tanë.
Më tej, gjatë vitit të kaluar ndërtuam partneritete të forta me të gjitha institucionet përkatëse në fushën e arsimit, trajnimit, rinisë dhe sportit, si dhe me Delegacionin e Bashkimit Evropian.
Besoj thellësisht se vetëm përmes një vizioni të përbashkët dhe bashkëpunimit ndërtohet një arsim modern evropian.
Sa pjesëmarrës, nxënës, mësimdhënës dhe organizata u përfshinë dhe a vëreni rritje të interesit të të rinjve në krahasim me vitin paraprak?
Mihajllov: Rritja e interesit është e dukshme dhe ky është një tjetër segment për të cilin jam jashtëzakonisht krenare. Gjatë vitit të kaluar zhvillova më shumë se 250 takime individuale me përfitues aktualë dhe potencialë, si dhe mbi 50 ngjarje të ndryshme në shumë komuna, përfshirë edhe zonat rurale, me qëllim promovimin e programit, prezantimin e praktikave të mira dhe dëshmimin në praktikë se mekanizmat funksionojnë.
Si rezultat, numri i aplikimeve është rritur me më shumë se 100 për qind. Edhe pse këtë vit kishim në dispozicion buxhetin më të madh deri më tani – 8,2 milionë euro të destinuara për përfituesit – për shkak të interesit jashtëzakonisht të madh, këto mjete sërish nuk mjaftojnë për t’i mbuluar të gjitha aplikimet cilësore.
Megjithatë, kjo është një shtysë shtesë që të negociojmë me Komisionin Evropian për sigurimin e një buxheti më të madh në vitet e ardhshme. Po punojmë intensivisht për ndërtimin e një modeli përmes të cilit do t’i tregojmë Bashkimit Evropian se Maqedonia e Veriut ka kapacitet, ka vullnet dhe meriton të ketë një Agjenci të standardit më të lartë evropian.
Një nga shtyllat kyçe të Erasmus+ është përfshirja. Çfarë hapash ndërmorët në këtë drejtim?
Mihajllov: Gjatë vitit të kaluar i kushtuam vëmendje të veçantë përfshirjes, përkatësisht përfshirjes së kategorive më të cenueshme, të cilat ndoshta më herët nuk kishin guximin apo mundësinë e mjaftueshme për të marrë pjesë në programin Erasmus+.
Rezultatet tashmë janë të dukshme: në raportin më të fundit të Komisionit Evropian, përfshirja është veçuar si pika më e ndritur në zbatimin e programit tonë Erasmus+, me vlerësim për përpjekjet e Agjencisë për përfshirjen e barabartë të personave me aftësi të kufizuara dhe nevoja të veçanta.
Përfshirjen e kuptoj si politikë aktive. Nuk presim që njerëzit të vijnë tek ne, por shkojmë ne tek ata që kanë më pak mundësi, për t’ua dëshmuar se ideja e tyre ka vlerë.
Kemi nisur edhe fushatën e titulluar “Të gjithë kanë dëgjuar për Erasmus+”, përmes së cilës vizitojmë edhe zonat më të thella rurale, duke përcjellë praktika të mira dhe duke i inkurajuar qytetarët të aplikojnë.
Dua t’i shemb të gjitha barrierat, sepse, pavarësisht se nga cili mjedis vini, para Agjencisë Nacionale të gjithë duhet të kenë pozita të barabarta fillestare.
Çfarë vijon në agjendën tuaj dhe cili është vizioni juaj për Agjencinë Nacionale deri në fund të mandatit?
Mihajllov: Qëllimi im parësor është që pas vetes të lë një kornizë plotësisht funksionale, në të cilën çdo aplikant do të ketë kushte të njëjta e të drejta në Erasmus+, të mbrojtura nga çfarëdo presioni të jashtëm.
Dua që mandati im të njihet për humanizimin e institucionit: ta shndërrojmë fuqinë administrative në vlerë shoqërore të dukshme dhe reale.
Agjencinë Nacionale e perceptoj si një strehë inovative, ku krijimtaria jo vetëm që mbështetet financiarisht, por edhe kultivohet dhe vlerësohet me sinqeritet.
Suksesi im më i madh do të jetë nëse arrijmë t’ua hapim përgjithmonë dyert të gjithë të rinjve dhe t’ua rikthejmë shpresën se, me dije, punë dhe ide cilësore, mund të kenë sukses edhe këtu, në vendin e tyre.
