Pas një takimi të ministrave të Mbrojtjes të BE-së në Bruksel, Kallas tha se komentet e Lavrovit tregojnë se Rusia nuk është aspak e interesuar për paqen.
Sipas saj, kjo tashmë është shumë, shumë e qartë për të gjithë.
Wadephul dhe Lavrov u takuan të shtunën në kuadër të Asamblesë së Përgjithshme të Kombeve të Bashkuara në Nju Jork.
Ky ishte takimi i parë i drejtpërdrejtë mes ministrave të Jashtëm të dy vendeve që nga fillimi i pushtimit të plotë rus të Ukrainës në vitin 2022.
Pas takimit, Lavrov bëri disa komente kritike për bisedën me Wadephul.
Ai tha se takimi i kishte krijuar përshtypjen se mesazhi i nënkuptuar i ministrit gjerman ishte ”kam denjuar të vij te ju”.
Kallas argumentoi se, nëse Moska do të ishte seriozisht e interesuar për përfundimin e konfliktit, ministri rus do ta kishte trajtuar homologun gjerman në një mënyrë tjetër.
Nga ana e tij, Wadephul e përshkroi bisedën si intensive.
Ai tha se gjatë takimit kishte diskutuar luftën në Ukrainë si dhe dronin e ngarkuar me eksplozivë që u gjet në aeroportin e Lajpcigut në gusht.
Berlini zyrtar ka fajësuar Moskën për incidentin, ndërsa Rusia e ka hedhur poshtë këtë akuzë.
Ministria e Jashtme gjermane akuzoi gjithashtu Moskën se po e përdor takimin në Nju Jork për qëllime propagandistike.
Një zëdhënës tha se Gjermania ishte e vetëdijshme për vlerën propagandistike të një takimi ballë për ballë, të cilin pala ruse e kishte shfrytëzuar dhe vazhdonte ta shfrytëzonte.
Megjithatë, zëdhënësi gjerman mbrojti vendimin për zhvillimin e takimit, duke thënë se ishte e arsyeshme që në këtë fazë të zhvillohej një bisedë e drejtpërdrejtë, me qëllim që Gjermania të përcillte edhe një herë qartë qëndrimet e saj.
