Tiranë, 11 shtator, Zhurnal.mk – Qeveria shqiptare ka miratuar marrëveshjen me qeverinë gjermane, me vlerë 110 milionë euro, për financimin e tre projekteve të rëndësishme në sektorin energjetik, nga të cilat 20 milionë euro janë grant.
Ministri i Infrastrukturës dhe Energjisë, Enea Karakaçi, në komunikimin për mediet pas mbledhjes së qeverisë, tha se projekti i parë lidhet me rehabilitimin e konvikteve për rritjen e eficiencës së energjisë.
Sipas tij, pas përfundimit me sukses të investimeve në 15 konvikte, marrëveshja i hap rrugë vijimit të investimeve në 14 konvikte të tjera, me synim përmirësimin e kushteve dhe rritjen e eficiencës energjetike.
Projekti i dytë lidhet me investimin në HEC-in e Vaut të Dejës, një prej hidrocentraleve më të rëndësishme të vendit, i ndërtuar rreth 50 vite më parë.
Ministri Karakaçi tha se HEC-i i Vaut të Dejës kontribuon me rreth 28% të prodhimit total të energjisë elektrike nga KESH dhe se investimi synon zgjatjen e jetëgjatësisë së tij me rreth 30 vite të tjera.
Projekti i tretë lidhet me digjitalizimin e operimit të transmetimit të energjisë. Në kuadër të tij parashikohet digjitalizimi i rreth 40 nënstacioneve, çka do të mundësojë menaxhim më efikas të flukseve energjetike dhe rritjen e kapaciteteve të furnizimit me energji.
Marrëveshja Shqipëri-Gjermani synon kështu mbështetjen e investimeve në eficiencën energjetike, modernizimin e infrastrukturës së prodhimit dhe transmetimit të energjisë dhe rritjen e sigurisë energjetike të vendit.
