Partia Demokratike njoftoi sot se, pesë deputetët e opozitës, anëtarë të Këshillit për Rregulloren, Mandatet dhe Imunitetin, rekomandojnë që në seancën plenare të Kuvendit, të votohet pro kërkesës së Prokurorisë së Posaçme për dhënien e autorizimit për zëvendësimin e masës së sigurisë për Belinda Balluku.
Pas përfundimit të mbledhjes për Rregulloren, Mandatet dhe Imunitetin, PD bëri të ditur qendrimin përfundimtar duke rekomanduar që Kuvendi të votojë pro “për miratimin e kërkesës se Prokurorisë së Posaçme Kundër Korrupsionit dhe Krimit të Organizuar, duke vendosur: Dhënien e autorizimit nga Kuvendi i Republikës së Shqipërisë, për arrestimin/heqjen e lirisë nëpërmjet zëvendësimit të masës së sigurimit nga ajo e “Ndalimit të daljes jashtë shtetit” dhe “Pezullimit të ushtrimit të një detyre a shërbimi publik”, në atë të arrest në burg/në shtëpi, për Belinda Ballukun”, e cila ushtron funksionet e deputetit, ministrit dhe zëvendëskryeministrit”.
Balluku është marrë e pandehur për shkelje të barazisë në tendera për Tunelin e Llogorasë, ndërsa ndaj saj GJKKO ka caktuar dy masa sigurie atë të pezullimit nga detyra si ministre e Infrastrukturës dhe Energjisë, njëherësh zëvendëskryeministre, si dhe ndalimin e daljes jashtë vendit.
