Kina i kundërshton goditjet ushtarake kundër Iranit, që shkelën ligjin ndërkombëtar, dhe u ka bërë thirrje palëve përkatëse të ndalojnë menjëherë armiqësitë dhe të kthehen në rrugën e dialogut e të negociatave, tha të mërkurën zëdhënësi i Ministrisë së Mbrojtjes Kombëtare kineze Jiang Bin.
Ai vuri në dukje se Kina është thellësisht e shqetësuar rreth konfliktit të zgjatur dhe përhapjes së tij në vendet fqinje, duke paralajmëruar që vazhdimi ose përshkallëzimi i armiqësive vetëm sa do të shtyjë Lindjen e Mesme drejt një humnere të rrezikshme dhe do të sjellë vuajtje më të mëdha për popujt e këtij rajoni.
Përparësia tani është që të gjitha palët përkatëse të ndalojnë menjëherë operacionet ushtarake, të kthehen në rrugën e dialogut e të negociatave dhe të mbrojnë së bashku paqen qëndrueshmërinë në Lindjen e Mesme dhe përtej këtij rajoni, shtoi zëdhënësi Jiang Bin.
Ndërkohë, në përgjigje të një pyetjeje rreth raporteve se ushtria amerikane kërkon qasje të pakufizuar në teknologjitë e inteligjencës artificiale (AI) të zhvilluara nga kompanitë e teknologjisë amerikane dhe ka përdorur gjerësisht mjete të AI-së në operacionet ushtarake kundër Venezuelës dhe Iranit, Jiang shprehu shqetësim rreth pasojave etike të praktikave të tilla.
Sipas tij, përdorimi i pakufizuar ushtarak i inteligjencës artificiale, duke përfshirë përdorimin e AI-së për të shkelur sovranitetin e vendeve të tjera apo lejimin e algoritmeve të kenë ndikim të tepruar mbi vendimmarrjen në kohë lufte, mund të dëmtojë kufizimet etike dhe përgjegjësinë në luftë.
Kina mbron një qasje të përqendruar te njerëzit dhe parimin e përdorimit të AI-së për gjëra të mira, tha Jiang, duke theksuar që duhet të ruhet përparësia e njeriut në aplikimet ushtarake të AI-së dhe se të gjitha sistemet e armëve përkatëse duhet të mbeten nën kontrollin njerëzor.
