Shkup, 10 qershor Zhurnal.mk – Drejtori i Fondit Shëndetësor, Sasho Klekovski përgjegjësinë për mos vazhdimin e kontratave për ish të punësuarit në Klinikën për Sëmundje të Fëmijëve e hedh tek drejtori i spitalit. Ai tha se ndodh që nëpër institucione shëndetësore të ketë vonesa për shpallje e konkurseve apo kërkesën në kohë për vazhdimin e kontratave.
“Të gjitha institucionet shëndetësore kanë drejtorë, ata janë punëdhënës dhe çdo drejtor merr përgjegjësinë si punëdhënës. Politikisht mund të them se ne kemi thënë qartazi që të punësohen secili i punësuar me kontratë në vepër që punon në një kohë më të gjatë… Në këtë situatë, a kemi të bëjmë me një rast të përzier? Duhet të sqarohet nëse bëhet fjalë për persona me pesë vite përvojë pune apo për të sapopunësuar”, tha drejtori i Fondit Shëndetësor, Sasho Klekovski
Ish-punonjësit prej disa muajsh kanë ngritur zërin për mos vazhdimin e kontratave të tyre dhe për pagat e papaguara për periudhën gjatë së cilës kanë punuar. Së fundmi, ata protestuan para Ministrisë së Financave, duke kërkuar realizimin e të drejtave të tyre, pasi kjo ministri u kishte kthyer përgjigje negative kërkesave të tyre.
Sipas ish-punonjësve, nga Ministria e Financave u është thënë se procedura do të shqyrtohet nga fillimi për të përcaktuar se ku qëndron problemi. Ndërkohë, nga Klinika e Fëmijëve theksojnë se përballen me mungesë reale të stafit dhe se që në fillim kanë kërkuar vazhdimin e kontratave për këta punonjës.
