Shkup, 11 janar – Profesoresha Arlinda Kadri Shahinoviq, e cila aktualisht ligjëron në Universitetin MIT në Shkup, dhe avokatja Suzana Joshevska Anastasovska janë dy propozimet e presidentes së Maqedonisë së Veriut, Gordana Siljanovska Davkova, për anëtare të reja të Këshillit Gjyqësor.
Kush është Kadri Shahinoviq
Arlinda Kadri Shahinoviq është doktore e shkencave juridike dhe ligjëruese universitare me përvojë të gjatë akademike dhe shkencore.
Në vitin 2007 ka diplomuar në drejtësi, në drejtimin e së Drejtës Evropiane dhe së Drejtës së Bashkimit Evropian (BE).
Në vitin 2009 ka fituar titullin magjistre e shkencave juridike, në drejtimin e së Drejtës Evropiane dhe së Drejtës së BE-së, në Universitetin e Parë Privat – FON, me temë magjistrature “Pengesa martesore”.
Në vitin 2016 ka doktoruar në Fakultetin Juridik “Justiniani i Parë” pranë Universitetit “Shën Kirili dhe Metodi” në Shkup, me disertacion doktorature me temë “Pengesa martesore në të drejtën romake dhe të drejtën bashkëkohore familjare”, duke fituar titullin doktoreshë e shkencave juridike.
Përvoja profesionale
Angazhimin e saj akademik e ka nisur në vitin 2007 si asistente e re në Fakultetin Juridik të Universitetit FON në Shkup.
Që nga viti 2010 ka qenë e angazhuar si asistente-magjistre në fushën e shkencave juridike në Fakultetin e Shkencave Juridike pranë Universitetit FON.
Në vitin 2017 është zgjedhur ligjëruese me titullin docente në fushën e disiplinave juridike, ndërsa në vitin 2023 është zgjedhur profesoreshë e asociuar në Fakultetin e Shkencave Juridike, Marrëdhënieve Ndërkombëtare dhe Diplomacisë në Universitetin MIT në Shkup.
Ajo ligjëron në studime universitare dhe pasuniversitare, kryesisht në fushat e së drejtës civile dhe familjare, dhe është autore dhe bashkautore e shumë punimeve shkencore dhe profesionale të botuara në revista dhe botime shkencore vendore dhe ndërkombëtare.
Gjithashtu, ka qenë anëtare e Komisionit për Falje pranë Presidencës së Maqedonisë së Veriut.
Angazhimi qytetar
Përveç punës akademike, Arlinda Kadri Shahinoviq është e angazhuar aktivisht në organizata dhe shoqata qytetare, si dhe në institucione të tjera që veprojnë në fushën e mbrojtjes së të drejtave të fëmijëve, të drejtave të njeriut dhe përgjegjësisë shoqërore.
Ajo është anëtare e Kuvendit të Përgjithshëm të SOS Fshatit të Fëmijëve, e angazhuar si eksperte juridike në Federatën e Futbollit të Maqedonisë (FFM), si dhe kryetare e Komisionit të Ankesave pranë FFM-së, funksion të cilin e ushtron në mandatin e dytë.
