Shkup, 3 gusht, Zhurnal.mk – SDSM reagoi me kumtesë ndaj publikimit të kryetarit të Shkupit, Orce Gjorgjievski, në të cilin ai i ftoi qytetarët për kujdes të përbashkët për pastërtinë e kryeqytetit, duke vlerësuar se një thirrje e tillë përbën pranim të paaftësisë së pushtetit lokal për t’u përballur me problemin.
Nga partia theksojnë se mesazhi i Gjorgjievskit, në të cilin ai thekson se “kujdesi për Shkupin nuk ka pauza, festa apo fundjava të zgjatura” dhe se vetëm me përgjegjësi të përbashkët qyteti mund të mbetet i pastër dhe i rregullt, është edhe një shembull tjetër i, siç thonë, transferimit të përgjegjësisë te qytetarët.
Në kumtesë, SDSM pretendon se kjo retorikë është marrë nga kryeministri Hristijan Mickoski dhe se në vend të zgjidhjeve konkrete, funksionarët e VMRO‑DPMNE dërgojnë mesazhe me të cilat përpiqen të fshehin, siç theksojnë, paaftësinë e tyre.
Partia drejton kritika edhe për punën e Gjorgjievskit, duke theksuar se ende nuk janë zgjidhur problemet me mbeturinat në kryeqytet, as nuk është përcaktuar përgjegjësia për ndotjen e lumenjve Lepenec dhe Vardar.
Gjithashtu, SDSM rihap çështjet e lidhura me furnizimin e inteligjencës artificiale për nevojat e Qytetit të Shkupit, duke kërkuar përgjigje për çmimin e projektit, zgjedhjen e kompanisë dhe mundësitë e lidhjeve me kryetarin e qytetit.
„Kur kryetari i qytetit i fton qytetarët të pastrojnë, kjo është pranim se vetë nuk mund të përballet me problemin“, theksojnë nga SDSM.
